Foto: Lada.kz
Mańǵystaý oblysy Beineý aýdanynda kópsalaly ortalyq aýdandyq aýrýhanaǵa aýqymdy kúrdeli jóndeý jumystary bastaldy. Meditsinalyq uiym 170-ten astam tósek-orynǵa eseptelgen jáne jyl saiyn 320 myńnan astam naýqasty qabyldaidy, dep habarlaidy Ult.kz.
Joba prokýratýra organdary qabyldaǵan sharalardyń nátijesinde memleketke qaitarylǵan aktivter esebinen qarjylandyrylýda. Qazirgi tańda aýdandyq aýrýhana halyqtyń tolyq kólemde mamandandyrylǵan kómek alý qajettiligin ótei almai otyr, naýqastar iri qalalarǵa júginýge májbúr. Beineý aýdanynda 68 myńnan astam adam turady, sondyqtan sapaly ári der kezinde kórsetiletin meditsinalyq kómek erekshe mańyzdy.
Joba aiasynda:
-
ǵimarattarǵa kúrdeli jóndeý júrgiziledi;
-
jańa qurylys salynyp, mamandandyrylǵan bólimsheler ashylady;
-
zamanaýi meditsinalyq jabdyqtar ornatylady (KT, MRT, angiograf, eksperttik deńgeidegi ÝDZ apparattary, reanimatsiia jáne operatsiialyq qural-jabdyqtar).
Jańartylǵan aýrýhanada insýlttik jáne kardiologiialyq ortalyqtar, meditsinalyq ońaltý, travmatologiia jáne ortopediia bólimderi jumys isteidi. Qabyldaý bólimi triaj júiesimen jabdyqtalady.
Bul bastama aýdan jáne kórshiles eldi mekenderdiń turǵyndaryn zamanaýi, qoljetimdi ári sapaly meditsinalyq kómekpen qamtamasyz etýge múmkindik beredi.
Jobanyń oryndalý barysy Mańǵystaý oblysy prokýratýrasynyń baqylaýynda.
