Mańǵystaý óńiriniń elge belgili birqatar azamaty suiytylǵan munai gazynyń baǵasyn retteýge atsalysatyn qoǵamdyq shtab qurylǵanyn málimdedi, dep habarlaidy "Ult aqparat".
«Qadirli mańǵystaýlyqtar, suiytylǵan munai gaz baǵasynyń Mańǵystaýda kúrt ósýine bailanysty halyq narazylyǵyn bildirýde. El óziniń ýájin bilikke jetkizip, talaptarynyń oryndalýyn suraýda. Bul - durys dep esepteimiz. Osy máselege bailanysty Mańǵystaýdyń birneshe azamaty qoǵamdyq shtab uiymdastyrdy. Shtab músheleri osy aýyldyń ózderińiz tanityn jigitterinen quralyp otyr. Áleýmettik jeliden jáne tikelei telefondarymyzǵa Mańǵystaýdyń azamattary shyǵyp, osy iske aralasaýymyzdy suraýda. Eldiń birligi, halyqtyń tynyshtyǵy, Mańǵystaýdyń amandyǵy bárimizdiń ortaq abyroiymyz, aǵaiyn. Qoǵamdyq shtabtyń negizgi maqsaty – eldiń talabyn Úkimet komissiiasyna jetkizip, suiytylǵan munai gaz máselesin sheshýge atsalysý. Biz osyǵan jumystanamyz», - dedi Májilis depýtaty Edil Jańbyrshin beinejazbada.
Qoǵamdyq shtabtaǵy azamattardyń naqty tizimi mynadai:
Edil Jańbyrshin - QR Parlament májilisiniń depýtaty,
Samat Musabaev - QR Parlament májilisiniń depýtaty,
Abbat Órisbaev - Mańǵystaý oblystyq máslihatynyń depýtaty,
Aiat Súgirbai - Mańǵystaý oblystyq máslihatynyń depýtaty,
Ýáis Ersaiynuly - Aqtaý qalalyq máslihatynyń depýtaty,
Ánýar Bimaǵambet - aqyn, jýrnalist,
Altai Almas - jýrnalist.
