Mańǵystaý oblysynyń Jetibai aýylyndaǵy «Jaýqazyn» balabaqshasynda tárbielenýshi keńse pyshaǵynan jaraqat aldy. Oqiǵa 20 sáýirde bolǵanymen, onyń beinejazbasy áleýmettik jelide taraǵannan keiin jurtshylyq nazaryna ilikti, dep habarlaidy ult.kz.
Oblystyq bilim basqarmasynyń málimetinshe, tynyǵý ýaqytynda balabaqsha direktorynyń uly «Kógershin» tobyna kirip, uiyqtap jatqan balalardy oiatqan. Sonyń saldarynan tárbielenýshilerdiń biri keńse pyshaǵynan jaraqat alǵan.
Oqiǵa kezinde top bólmesinde tárbieshi men onyń kómekshisi bolmaǵan. Beinejazba jariialanǵannan keiin bilim basqarmasy tekserý júrgizip, kadrlarda kórsetilgen jaittyń ras ekenin rastady.
Tekserý nátijesinde top tárbieshisinen túsinikteme alynyp, anyqtalǵan zańbuzýshylyqtardy joiý týraly nusqama berildi. Aýdandyq bilim bóliminiń 2026 jylǵy 13 mamyrdaǵy buiryǵymen balabaqsha direktorymen eńbek sharty buzyldy.
Sondai-aq mektepke deiingi uiym direktory men top tárbieshisi ákimshilik jaýapkershilikke tartylyp, olarǵa aiyppul salyndy.
