Mańǵystaýda bala zorlaý qylmysyna alǵash ret ómir boiyna bas bostandyǵynan aiyrý jazasy taǵaiyndaldy, dep habarlaidy "Ult aqparat" Mańǵystaý oblystyq sotynyń baspasóz qyzmetine silteme jasap.
Mańǵystaý oblystyq qylmystyq ister jónindegi mamandandyrylǵan aýdanaralyq soty 2021 jylǵy 25 qańtarda jas balany zorlaý deregi boiynsha qylmystyq isti qarady. (QK-niń 120-babynyń 4-bóligi, 121-babynyń 4-bóligi boiynsha).
Is memlekettik aiyptaýshynyń, jábirlenýshiniń zańdy ókiliniń, sottalýshynyń jáne onyń qorǵaýshysynyń qatysýymen jabyq sot otyrysynda qaraldy.
«Sottalýshy D. 2020 jylǵy 28 mamyrda túngi ýaqytta óziniń tanysynyń páterine kelip, onyń joqtyǵyn paidalanyp, mas kúiinde balaǵa kúsh qoldanyp, basy men betine birneshe ret soqqy jasap, zorlaý jáne seksýaldyq sipattaǵy áreket jasaǵan» delingen habarlamada.
Memlekettik aiyptaýshy istiń mán-jaiyn, balaǵa qoldanylǵan zorlyq-zombylyqty eskere otyryp, sottalýshyny ómir boiy bas bostandyǵynan aiyrýdy surady.
Sottalýshynyń qorǵaýshysy kúdiktiniń kinási tolyq dáleldenbegendikten ony qamaýdan bosata otyryp, qylmystyq qýdalaýdy toqtatýdy surady.
Sottalýshynyń atalǵan qylmysty jasaýdaǵy kinási anyqtalǵandyqtan, sot tergeýi barysynda dáleldemelerdi jan-jaqty zertteý arqyly sot aiyptaýdyń barlyq epizodtary boiynsha aiyptaý úkimin shyǵardy.
Sot jasalǵan asa aýyr qylmystyń sipaty men qoǵamdyq qaýiptilik dárejesin jáne onyń saldaryn eskere otyryp, QR QK 58-babynyń 4-bóligine sáikes sottalýshyǵa ómir boiy bas bostandyǵynan aiyrý túrindegi jaza taǵaiyndady.
Sot úkimi zańdy kúshine engen joq.
