Foto: MAM
5 sáýir kúni Aqtaý qalasynda «Aqtaý – Túrki áleminiń mádeni astanasy 2025» jylynyń saltanatty ashylý rásimi ótti, dep habarlaidy Ult.kz.
Ashylý saltanatyna Halyqaralyq túrki mádenieti uiymyna (TÚRKSOI) múshe elderdiń – Qazaqstan, Ázerbaijan, Qyrǵyzstan, Túrikmenstan, Túrkiia jáne Ózbekstannyń mádeniet ministrleri men ókilderi qatysty. Qurmetti qonaqtar qatarynda Túrki memleketteri uiymynyń ókilderi jáne Vengriia delegatsiiasy boldy.
Foto: MAM
Kaspii teńiziniń jaǵalaýynda ótken aýqymdy sharany 100 myńnan astam kórermen tamashalady. Olardyń qatarynda jergilikti turǵyndarmen qatar Qazaqstannyń túrli óńirlerinen jáne shet elderden kelgen qonaqtar da bar.
Foto: MAM
Saltanatty keshtiń basty nysandarynyń biri – «Darhan Dala» etnoqalashyǵy boldy. Bul – qazaqtyń dástúrin, Mańǵystaýdyń kieli murasyn jáne túrki halyqtarynyń tarihyn nasihattaýǵa arnalǵan biregei mádeni keńistik.
Is-shara aiasynda TÚRKSOI-ǵa múshe elderdiń sýretshileri men qolónershileriniń kórmesi de ashyldy.
Merekelik keshte Aqtaý aspanyn erekshe tańǵajaiyp kóriniske bólegen dron shoýy ótti. Bir mezette 500-den astam dron kókke kóterilip, Qazaqstannyń týy, Mańǵystaýdyń tabiǵatyna tán janýarlar men bozjyra taýy, halyqaralyq sharanyń logotipi jáne qazaqtyń ulttyq mádenietiniń elementteri beinelendi.
Foto: MAM
