Aqtaý qalasyndaǵy «Dostyq úiinde» Halyq jazýshysy, QR Eńbek Eri Ábish Kekilbaiulynyń 80-jyldyǵyna arnalǵan ádebiet jáne óner qairatkerleriniń halyqaralyq kongresi ótti, dep habarlaidy "Ult aqparat".
Mańǵystaý oblysy ákimdigi men Sh.Esenov atyndaǵy Kaspii memlekettik tehnologiialar jáne injiniring ýniversiteti muryndyq bolǵan sharaǵa álemniń ár túkpirinen kelgen ádebiettaný, til bilimi, tarih, filosofiia, pedagogika, psihologiia, áleýmettaný, saiasattaný sekildi gýmanitarlyq sala mamandary, memleket jáne qoǵam qairatkerleri men ǵalym-zertteýshiler qatysty.
Birinshi bolyp sóz alǵan QR premer-ministriniń orynbasary Berdibek Saparbaev Ábish Kekilbaevtyń ǵaryshtyq oilaý júiesi, dariiadai sheksiz bilimi, este saqtaý qabiletiniń keremet qupiiasyn ashý úshin búgingi kúnniń qarymdy zertteýshileri jabyla kirisýi kerektigin aitty.
«Shekspirdiń sheberligi men tereńdigine boilaimyz dep ol týraly álemde ártúrli tilde 15 myń, keibir derekterde 25 myńnan astam kólemdi zertteýler jazylǵan eken. Onyń ishinde tek til mamandary ǵana emes, onyń ishinde psiholog ta, dáriger de, saiasatker de, tarihshy da, sýretshi de, saiahatshy, mýzykant, geolog, agronom, tipti mal dárigeri men tis dárigeri de bar kórinedi. Ábish áleminiń lingvistikalyq-geografiialyq-jaratylystanýshylyq-adamtanýshylyq-psihologiialyq kartasyn tolyqqandy syzyp shyǵý úshin de osyndai deńgeidegi zertteý jumystary kerek. Onyń darynyn bir ǵana filologiialyq ólshemmen ólsheýge kelmeidi. Onyń bir ózi álemdik ýniversitet siiaqty bolǵan adam. Mundai daryndar adamzattyń tarihynda sirek kezdesedi», - dedi B.Saparbaev.
Halyqaralyq kongreske jinalǵan qoǵam qairatkerleri, jýrnalist, jazýshylar bolsa, «Ábish Kekilbaev jáne qazirgi qazaq ádebieti» taqyrybynda baiandama jasady.
HH ǵasyrdyń 60 jyldary ádebietke kelip, jarty ǵasyrdan astam ýaqyt boiy qazaq rýhaniiatyna, ádebieti men mádenietine ólsheýsiz úles qosqan, Táýelsiz Qazaqstannyń qalyptasýyna eren eńbek sińirgen memleket jáne qoǵam qairatkeri, akademik-jazýshy Ábish Kekilbaevtyń bai ádebi murasy da – qazaq ádebieti men mádenietiniń altyn qoryna qosylǵan qazyna. Osy oraida talantty aqyn-jazýshylardyń shyǵarmashylyǵyn zerdelep, olardyń ideialyq-kórkemdik mánin ashý, jas urpaq tárbiesine paidalaný, sýretkerdiń álemdik ádebiettegi ornyn aiqyndap, halqymyzdyń rýhani-mádeni kemeldenýindegi ornyn paiymdaý – igi is bolmaq.
76 jasynda ómirden ótken Ábish Kekilbaevtyń artynda óshpes mura bolyp qalǵan «Úrker», «Eleń-alań», «Ańyzdyń aqyry» tarihi romandary men «Kúi», «Shyńyraý», «Hansha dariia hikaiasy», «Qus qanaty» jáne taǵy basqa ádebi shyǵarmalary bar. Endi Ábish Kekilbaevtyń jańa, ózinen keiingi ǵumyryn jastardyń arasynda, jalpy mádeniet jáne óner qaitarkerleriniń arasynda dáripteýdiń jańa ǵumyry bastaldy desek bolǵandai. Abyz jazýshy ómirden ótse de, onyń artynda qalǵan mol murasy esh ýaqytta óshpek emes. Osy turǵyda Mańǵystaýdan bastaý alǵan sharalar legi 6 qarashada Nur-Sultan qalasynda jalǵaspaq.
Kongress aiasynda birneshe shara ótti. Plenarlyq májilis jáne 5 sektsiia jumys istedi. Plenarlyq májilistiń maqsaty – Ábish Kekilbaev shyǵarmashylyǵynyń álemdik kórkem keńistiktegi orny men onyń adamzattyń rýhani damýyna ózindik yqpalyn Adamtaný jáne Jaratylys kontseptsiiasy konteksinde zerdeleý, ony álemdik ǵylymi ainalymǵa engizýdiń tetikterin taldap, talqylaý.
