Mańǵystaýlyq 80 jastaǵy qariia áli kúnge ańǵa shyǵady, dep habarlaidy "Ult aqparat".
Jarma eldimekeninde seksenniń seńgirine kelgen aqsaqal Allaberdi Aqshabaev turady. Shiraq qimyldap, ańshylyqty kásip etken qariia áli kúnge deiin ań aýlap, qaqpan qurady. Ol jastaiynan ańshylyqpen ainalysqan ákesiniń janynan bir eli qalmai, kókjal alý ádisin meńgergen.
«Ol kezde aýyl turǵyndarynyń azyǵy - dalanyń ańy. «Mergennen - syralǵy, batyrdan - saýǵa» demekshi, kezinde ańshy alǵan ańnyń etin búkil aýyl bolyp bólip jegen. Ákemniń janynda júrip úirengen men búginde eldi mekenniń taý-tasy, qumyna basylǵan izdi tanimyn. Alǵash ret ańǵa 20 jasymda shyqtym», - dedi Allaberdi Aqshabaev.
Mańǵystaý nemese ózge óńir bolsyn, malǵa qasqyr shapsa, Allaberdi arnaiy aqsaqaldy izdep keledi eken. Qolynda 20-dan astam qaqpany bar Allaberdi aqsaqaldyń qaqpan qurýǵa kelgende qoly epti.
Qajyrly qariia «ańǵa shyqsam, tula boiym keńip sala beredi, qaqpan qurmasam da, keń dalany bir sharlap kelsem bolǵany», deidi.
