Mańǵystaý oblysynda 600 iri sharýa qojalyǵy men 6 myńǵa jýyq jeke úi qojalyǵyna qarjylai qoldaý kórsetildi.
Bul týraly oblystyq qoǵamdyq kommýnikatsiia ortalyǵynda ótken brifingide Mańǵystaý oblysy aýyl sharýashylyǵy basqarmasynyń basshysy Serik Qaldyǵul málim etti, dep habarlaidy "Ult aqparat".
«Biyl Mańǵystaý oblysynda qýańshylyqtan zardap shekken sharýalarǵa qarjylai qoldaý kórsetý úshin úkimet rezervinen 1,9 mlrd teńge bólindi. Qaitarymsyz qarajat tórt túliktiń analyq basy úshin mal azyǵyna jumsalǵan shyǵyndy ishinara óteýge berilip otyr.
Qazirgi tańda bólingen qarajattyń 57% igerildi iaǵni, 5900 jeke qosalqy úi sharýa qojalyqtaryna 745 mln. teńge jáne 575 sharýa qojalyǵyna 395 mln. teńge qarjylai memlekettik qoldaý kórsetildi», - dedi S. Qaldyǵul.
Qazirgi ýaqytta sharýalardy jem-shóppen qamtamasyz etip, mal azyǵy tapshylyǵyn joiý maqsatynda birqatar jumystar júrgizilip jatyr.
1. Jergilikti biýdjetten 150 mln.teńge bólinip, «Kaspii» ÁKK AQ-y arqyly atalǵan qaitarymdy qarjyǵa 15 shildeden beri ár qala, aýdandardan taǵaiyndalǵan operatorlar qajettilikke qarai shóp tasymaldap jatyr.
Búgingi kúnge deiin 1350 tonna shóp satyp alyndy. Bul jumystar jyl aiaǵyna deiin jalǵasady.
2. Jergilikti biýdjetten 54 mln teńge bólinip, qaitarymdy qarajatqa aýdandardan taǵaiyndalǵan operatorlar Qostanai oblysynan 950 tonna arpa jetkizdi. Qazirgi tańda arpa túgel satylyp, ainalymdaǵy qarjyǵa qosymsha 1 myń tonna mal azyǵyn satyp alý jumystary júrýde.
3. Sonymen qatar 107 mln teńgege 15 vagon 3-4 sortty bidai (bidai qaldyǵy) satyp alyndy, jaqyn kúnderi óńirge jetkiziledi.
Jalpy jyl basynan beri oblysqa 41 500 tonna shóp tasymaldandy. Sonyń 3500 tonnasy ózge óńirlerden kómek retinde jetkizilip, qýańshylyqtan zardap shekken mal ielerine tegin úlestirildi. Al, óńirge tasymaldanǵan jem kólemi 24 myń tonnany qurady.
Spikerler aýyl sharýashylyǵy janýarlaryn birdeilendirý bazasyna tirkelmegen malǵa memleket tarapynan sýbsidiia nemese qoldaý kórsetilmeitinin aitty.
Qazir óńirde 636 824 bas mal tirkelgen. Onyń ishinde ólgeni - 1163 (jalpy sanynyń 0,18%). Ólgen maldyń 194-i ǵana aýylsharýashylyǵy janýarlaryn birdeilendirý derekqoryna tirkelgen.
Tótenshe jaǵdailar departamenti aýa ylǵaldylyǵyna tekserý júrgizdi. Nátijesi tótenshe jaǵdai jariialaý sharttaryna sáikes kelgen joq. Sondai-aq, janýarlar arasynda ýlaný men juqpaly aýrýǵa shaldyǵý deregi tirkelmedi jáne ósimdikter ziiankesterden zaqymdanbaǵan, iaǵni tótenshe jaǵdai jariialaýǵa zańdy negiz joq.
Sonymen qatar óńirde qysqy mal azyǵynyń qoryn daiyndaý qyzý júrip jatyr.
2021-2022 jyldarǵa óńirdegi tórt túlikti qystyq mal azyǵymen qamtamasyz etý maqsatynda, QR Premer-Ministri A.Maminniń tapsyrmasyna sáikes, biýdjetten qaitarymdy qarajat retinde mal azyǵyna 5,3 mlrd teńge qarjy bólindi (1,9 mlrd teńge – shóp, 3,4 mlrd teńge – jem).
«Bul qarjyǵa jyl sońyna deiin 26 myń tonna shóp pen 34 myń tonna jem satyp alynady dep josparlanǵan. Qazir atalǵan qarjynyń 600 mln teńgesine mal azyǵyn tasymaldaityn operatorlar taǵaiyndalyp, ózge óńirlerden shóp tasymaldaý jumysy bastalyp ketti», - dedi Qaldyǵul.
Budan bólek Atyraý men Aqtóbe oblystarynyń shabyndyq jerlerinen shóp shabýǵa 5 sharýa qojalyǵy attandy. Olar ózderine qor jinap, artyǵyn ózge mal ielerine satady.
Sonymen qatar búgingi kúni jergilikti shabyndyqta 14 brigada shóp shaýyp jatyr. Olar jyl aiaǵyna deiin 15 myń tonna shóp daiyndamaq.
