Mańǵystaý týý kórsetkishi boiynsha respýblikada kósh bastap tur. Jyl saiyn óńirde 20 myń bala dúniege keledi. Biyl óńirdegi halyq sany 27 myńǵa ósip, 707 myń adamnan asty, dep habarlaidy "Ult aqparat".
Óńirde densaýlyq salasy jaqsy kórsetkishpen damyp keledi. Máselen, biyl ana ólimi 3%-ǵa tómendep otyr. Ómir súrý uzaqtyǵy 74,5 jasqa jetken. Jalpy, ólim kórsetkishi 2,6%-ǵa kemidi. 10-ǵa jýyq ozyq tehnologiiamen jabdyqtalǵan jeke menshik meditsinalyq nysandar ashyldy. 2019 jyly óńirde 82 myńnan astam adam aýrýhanada emdelip shyqqan, 5 myń naýqasqa ota jasalǵan. Naýqastyń tez saýyǵýyna múmkindik beretin túrli ádister paida boldy. Mańǵystaýlyq hirýrgter júrek, búirek, ókpe, asqazanǵa kúrdeli otalardy jasaýdy meńgerdi. Oblystyq aýrýhanadaǵy bir ǵana endoskopiia bóliminde 1 jylda 2 myń adamǵa ota istelip, syrqatynan aiyqty.
«Osy 2 myń operatsiianyń ishinde negizgisi endoskopiialyq jolmen istelýde. Operatsiia sany da jyl saiyn artyp jatyr. Bizdiń bólimde kezekke adamdar 1 ai buryn jazylady. Respýblika ishinde eń úlken kórsetkish deýge bolady», - deidi videoendoskopiialyq hirýrgiia bóliminiń meńgerýshisi Talǵat Muqantaev.
Aldaǵy ýaqytta oblystyq aýrýhanada ishki aǵzalardy aýystyrý otalaryn jasaýdy josparlaidy. Budan bólek, dári-dármek máselesi de tiimdi sheshilgen. Óńirde biyl 3 mlrd teńgege jýyq qarajatqa 60 myń naýqas tegin em-dom qabyldaǵan.
Densaýlyq saqtaý salasynda másele de joq emes. Sonyń biri densaýlyq saqtaý nysandaryn salý. Ekinshi másele mamandar tapshylyǵy áli de baiqalady.
«Maman tapshylyǵynyń basty sebebi, kadrlar jekemenshik meditsinalyq mekemelerge aýysýda. 240 maman jetispeidi. Jalpy tájiribelik dáriger, nevropotolog, psihiator, aiasy tar sala mamandary jetispeidi. Mamandardy tartý úshin bir másele – olardy baspanamen qamtý», - deidi Mańǵystaý oblystyq Densaýlyq saqtaý basqarmasynyń basshysy Ánýar Álimjanov.
