Foto: Mańǵystaý oblysy ákimdiginiń baspasóz qyzmeti
Mańǵystaýda Bozjyra shatqalynda vizit-ortalyǵynyń qurylysy bastaldy. Joba boiynsha vizit-ortalyqta saiahattaýshylarǵa barlyq jaǵdai qarastyrylady. Munda qonaq kútý ortalyǵy, etno-kafe men glempingter boi kótermek. Osy oraida Ult.kz tilshisi «Mańǵystaý týristik orynǵa ainala ma?» degen suraqtyń jaýabyn izdep kórdi.
Keshen qurylysy otandyq investordyń jeke qarjysyna júzege asyrylmaq. Joba avtorlarynyń aitýynsha, vizit ortalyǵy ekologiialyq talaptarǵa jáne turaqty týrizm printsipterine tolyqtai sai keledi.
«Vizit-ortalyq qorshaǵan ortaǵa ziian keltirmeitindei etip jobalanǵan. Biologiialyq tazartý júieleri, qoqysty suryptap jinaý, kún energiiasyn paidalaný syndy sheshimder kózdelip otyr. Týristerge barlyq jaǵdai jasaý — basty maqsatymyz. Sonymen qatar qazaqtyń ulttyq taǵamdary men qundylyqtaryn nasihattaýǵa da mán beremiz», – deidi joba jetekshisi Sáýle Jańabaeva.
Foto: Mańǵystaý oblysy ákimdiginiń baspasóz qyzmeti
Jobada 17 glemping pavilony, 50 qonaqúi bólmesi, jalpy aýmaǵy 450 sharshy metr bolatyn vizit-ortalyq pen etno-kafe qarastyrylǵan. Týristik keshen 2027 jyly paidalanýǵa berilmek.
Qazirgi tańda Mańǵystaý oblysy boiynsha 590 tarih jáne mádeniet eskertkishi memlekettik tizimge engizilgen, onyń ishinde 20 eskertkishtiń respýblikalyq mańyzy bar. Olar 350 arheologiialyq nysandar – tas dáýiriniń eldi mekenderiniń oryndary, qola jáne temir dáýiriniń dini-qabirleý keshenderi, orta ǵasyrlyq Uly Jibek jolyndaǵy qalalar, bekinister, kerýen-sarailar, sondai-aq, úlken-kishi sáýlet týyndylary shoǵyrlanǵan 176 ansambldi keshender men 64 sáýlet jáne qala qurylysynyń eskertkishteri. Buǵan qosa 900-ge jýyq tarihi-mádeni mura obektileri aldyn ala esepke alý tizimine engizilgen.
«2021 jyly «Mańǵystaý túbeginiń jerasty meshitteri» degen ataýmen IýNESKO-nyń Búkilálemdik muralarynyń aldyn-ala tizimine Oǵlandy jerindegi Beket ata jerasty meshiti, Qaraman ata, Shaqpaq ata, Shopan ata jáne Sultan-úpi jerasty meshitteri engizilgen. Sondai-aq, bul tizimge «Jibek joly: Edil-Kaspii mańy aralyq koridor» seriialyq transulttyq nominatsiiasy sheńberinde orta ǵasyrlyq Saraishyq, Jaiyq qalashyqtarymen qatar Mańǵystaýdaǵy «Qyzylqala qalashyǵy» da engizilgen.
Oblystaǵy sakraldy nysandarmen qatar, Sherqala, Bozjyra, Tuzbaiyr, Ybyqty saiy, Torysh konkretsiialyq tastary tárizdi erekshe qasterlenetin tabiǵi oryndarǵa alys-jaqyn shetelderden keletin týrister men qonaqtardyń sany kún sanap artyp keledi. Týristik baǵytta ornalasqan tarihi-mádeni eskertkishterge jyldyń kóktem, jaz jáne kúz mezgilderiniń barlyq ýaqyttarynda da suranystar toqtaǵan emes. Olar oblystaǵy týristik qyzmet kórsetetin uiymdar arqyly óz joldarymen bara beredi, keide tarihi-mádeni qoryqtyń mamandaryna gid-ekskýrsovod qajettigin aityp, habarlasyp jatady, kópshilik kieli oryndarda kelýshilerge qoǵamdyq qorlar shyraqshylyq qyzmetin kórsetip otyr», – deidi «Mańǵystaý memlekettik tarihi-mádeni qoryǵynyń» direktory Nurlan Qulbaev.
Mańǵystaý – elimizde týristik salany damytýda úlken múmkindigi bar aimaq. Bul sózimizdiń dáleli, mańǵystaýlyq kásipker Berik Daýenov, Zhusan travel negizin qalap, óńirge kelgen týrister men qonaqtardy mańǵaz Mańǵystaýdyń mańyzdy jerlerin aralatyp júrgeli biraz jyl boldy.
«Kelýshilerdiń qai qaisyna da sol jer týraly oqyǵanymyz bar, kórgenimiz, estigenimiz bar, tarihyna qarai erekshelikterimen tanystyramyn. Týristerdiń qyzyǵýshylyǵy, bizde eń hit bolǵany 2020 jyly Bozjyraǵa qonaq úi salynýdan bastaldy. Sodan keiin kóp adam tek Bozjyrany suraidy. Men klientterge odan basqa birneshe tabiǵi oryndar baryn aitamyn. Qansha kúndik týr bolsa da, kelýshiler mindetti túrde Bozjyrany kóreiikshi deidi. Jalpy bizdiń Mańǵystaýǵa týrizm salasyna qyzyǵýshylyq pandemiia kezinen bastaldy. Oǵan deiin qyzyǵýshylyq bolmady, adamdardyń kóp legi bolǵan joq. Pandemiia kezinde shekara jabylǵanda adamdar syrtqa shyǵa almady da, elimizdegi jerlerdi aralai bastady. Oǵan deiin Aqtaý dese, Kaspii teńizi men Beket ata ǵana oiǵa oralatyn. Al bizde odan basqa qanshama týristik oryndar óte kóp jáne olar bir birine uqsamaidy», – deidi Berik Daýenov.
Mamandardyń aitýynsha, kieli jerler nemese rýhani qasietti oryndar – halyqtyń rýhani dástúriniń tiregi, erekshe qasterlenetin tabiǵi jerler, dini sáýlettiń airyqsha qasterli eskertkishteri, keseneler, halyq jadynda óshpes iz qaldyrǵan tarihi jáne saiasi oqiǵalarmen bailanysty oryndar da bar. Aldaǵy ýaqytta, osy «kieli beldeýdiń» obektileri týrizm indýstriiasy úshin órleý núktesine ainalýy tiis.
Aqbota Musabekqyzy
