Mańǵystaý oblysyna qarasty aýyldyq eldi mekenderde tsifrlyq saýattylyqty arttyrý jumystary óz nátijesin berýde. Atalǵan seminarǵa aýyl turǵyndary belsendi qatysyp jatyr. Búginde oblysta 5 myńnan astam adam atalmysh kýrstan ótken.
«Aýyl turǵyndary tsifrlyq saýattylyq turǵysynan belsendilik tanytyp jatyr. Oǵan mysal retinde Túpqaraǵan aýdanyn aitsam bolady. Sol jerge jumys saparymmen barǵanymda aqsaqaldar men aqjaýlyqty ájeler tsifrlyq saýattylyqty ne ekenin biledi eken. Qaraqiia aýdanynda da onlain júie qarqyndy júrgizilip jatyr», – dedi Mańǵystaý oblysy ákiminiń orynbasary Rýslan Sakeev.
Sondai-aq, ol osy baǵyttaǵy isterdiń kúsheie beretindigin basa aitty.
«Jyldyń sońyna deiin bul kórsetkishti ulǵaita beretin bolamyz. Osyǵan bailanysty «Qazposhta» AQ, «Ulttyq aqparattyq tehnologiialar» AQ, «Qazaqtelekom» AQ-men birlesip ótkizýdemiz. Bul mekemeler osy baǵytta birqatar jumystar atqarýda», – deidi R. Sakeev.
Onyń aitýynsha, oblystaǵy memlekettik mekemelerde tsifrlyq jańashyldyqty úireten arnaiy mamandar men keńesshiler bar. Mekemege kelýshi barlyq turǵynǵa eń aldymen kompiýterler arqyly aqparattyq tehnologiialardy qalai qoldaný kerektigin úiretedi.
«Osylaisha, 70 myń adam qosymsha bilim aldy. Olar endigi IT-tehnologiialardy tanyp bildi. Onyń qalai qoldaný kerektigin biledi. Egde jastaǵy adamdar tsifrlyq tehnologiialarǵa senbeidi. Olar ózderiniń buryńǵy ádetinshe emhanaǵa aiaqtai keledi. Buryńǵydai kezekke turǵysy keledi, dárigermen áńgimeleskisi keledi. Muny ózgertý qiynǵa soǵýda. Al, jastar atalǵan protseske túsinýshilikpen qaraidy», – dep atap ótti ákimniń orynbasary.
Mańǵystaý oblysy «Tsifrlyq Qazaqstan» memlekettik baǵdarlamasyn sátti júzege asyryp jatqan óńirlerdiń biri. Qoǵam ómiriniń barlyq salasyna jáne qyzmet kórsetý mekemelerine jappai tsifrlyq tehnologiialar engizilip jatyr.
«Bizdiń oblys respýblikadaǵy tsifrlandyrylǵan aimaqtardyń biri. Internetke qoljetimdilik – 96 paiyz, kompiýtermen qamtamasyz etý – 95 paiyzdy quraidy. Mańǵystaý oblysynda internetsiz aimaq joq. Oblysta 61 eldi meken bar. Biz olardy úlken ne kishi dep bólmeimiz. Barlyǵyn tolyqtai tsifrlandyratyn bolamyz», – dep túiindedi ol.
Mańǵystaý oblysynda tsifrlyq saýattylyqty arttyrý kýrsy 2018 jyldyń 1-shi maýsymynda bastalǵan bolatyn. Jospar boiynsha 5 myń adamdy oqytý kerek bolǵan. Shilde aiynyń basynda atalǵan seminar boiynsha 5216 adam oqytyldy. Bir adamdy oqytý úshin nebári 20 minýt ýaqyt ketedi.
