Premer-ministr Oljas Bektenov Munaily aýdanynynyń Besshoqy aýylynda balalardyń ýlanýyna bailanysty densaýlyq saqtaý, oqý-aǵartý ministrlerin, Mańǵystaý oblysy ákiminiń esepterin tyńdady. Bul týraly úkimet baspasóz qyzmetine silteme jasaǵan Ult.kz habarlaidy.
Sol esepke qaraǵanda, búgingi tańda 460 bala dárigerlerdiń baqylaýynda, onyń 83-i aýrýhanaǵa jatqyzyldy, 2 bala jansaqtaý bóliminde. Zardap shekkenderdiń barlyǵy, onyń ishinde jansaqtaý bólimindegi balalardyń jaǵdaiy turaqty. Densaýlyǵynyń jaqsarýyna bailanysty reanimatsiiada jatqan eki bala jalpy bólimshege aýystyryldy.
"Qazirgi ýaqytta aýrýhanaǵa ýlaný belgilerimen túsken balalardyń barlyǵyna tolyq kólemde qajetti meditsinalyq kómek, sonyń ishinde psihologiialyq kómek kórsetilýde. Oqiǵa ornynda QR Oqý-aǵartý ministrligi Balalardyń quqyqtaryn qorǵaý komitetiniń ókilderi jumys istep jatyr. Zardap shekkenderge jáne olardyń otbasylaryna qoldaý sharalaryn kórsetý boiynsha jumystar júrgizilýde. Táýlik boiy shtab jumys isteidi", - delingen habarda.
Aýrý oshaǵyn oqshaýlaý jáne joiý sharalaryn kúsheitý úshin óńirge "Qoǵamdyq densaýlyq saqtaý ulttyq ortalyǵy" ShJQ RMK "Sanitariialyq-epidemiologiialyq saraptama jáne monitoring ǵylymi-praktikalyq ortalyǵy" filialynyń mamandary jiberilgen.
Úkimet basshysynyń tapsyrmasy boiynsha bir ai ishinde respýblikadaǵy barlyq mektepterdiń ashanalarynda sanitariialyq-epidemiologiialyq talaptardyń saqtalýyna monitoring júrgiziledi. Ol mekteptegi tamaqtanýdyń qaýipsizdigin qamtamasyz etý jáne mundai jaǵdailardyń qaitalanýyna jol bermeý sharalaryn kúsheitýge baǵyttalǵan.
№8 mektepte tergeý jumystary júrgizilip jatyr. Kináliler jaýapqa tartylady.
Buǵan deiin Mańǵystaý oblysynda tamaqtan ýlanǵandardyń sany 300-ge taiap qalǵanyn jazǵan edik.
