Kórneki sýret: pixabay.com
Mańǵystaý oblysyndaǵy Kendirli demalys aimaǵynda jylyna 300 myń adamǵa deiin qabyldai alatyn týristik qala salynady, dep habarlaidy "Ult aqparat".
Prezidenttiń biylǵy maýsym aiynda ótken týrizmdi damytý jónindegi keńeste bergen tapsyrmalaryn iske asyrý maqsatynda Mańǵystaý oblysynda óńirdiń týristik áleýetin damytý boiynsha jumystar júrgiziledi.
Úkimettiń málimetinshe, Kendirli kýrortty aimaǵynda jylyna 300 myń adamǵa deiin qabyldai alatyn týristik qala salynady. Injenerlik infraqurylym qurylysy bastaldy.
"Kendirli teńiz jaǵalaýynyń ereksheligi – shomylý maýsymynyń uzaqtyǵy. Geografiialyq ornalasýy da mańyzdy ról atqarady. Ol óziniń biregeiliginiń arqasynda týristerdi tartýǵa yńǵaily. Osyǵan bailanysty prezident Kendirli týristik aimaǵyn qurý boiynsha naqty tapsyrma berdi. Biz tiisti infraqurylymy bar jáne týristerge qyzmet kórsetetin arnaiy týristik qalashyq salýdy josparlap otyrmyz. Bul Jańaózen qalasynyń negizgi júktemesiniń tómendeýine jaqsy áser etedi", – dedi Kendirli aýylynyń ákimi Meken Úisenov.
Eske salaiyq, buǵan deiin prezident biylǵy joldaýynda Qatonqaraǵai, Zaisan jáne Kendirli óńirleri aýmaǵynda áýejai, áýe beketterin salý kerek ekenin málimdedi. Osyndai demalys aimaqtarynda sapasy joǵary jol infraqurylymy bar áýe beketteri men áýejailar salý qajet dedi el basshysy.
