Mańǵystaý oblysy Maqtaaral aýdanyna 77,5 tonna júk jiberdi. Bul týraly Ortalyq kommýnikatsiialar ortalyǵynyń óńirlik filialynda ótken brifingte MO ishki saiasat basqarmasy basshysynyń orynbasary Nurtas Sali málimdedi.
Túrkistan oblysy Maqtaaral aýdanynda oryn alǵan tótenshe jaǵdaiǵa bailanysty zardap shekken turǵyndarǵa kómek kórsetip, qoldaý bildirý maqsatynda Mańǵystaý oblysynda gýmanitarlyq kómek jinaý pýnkteri uiymdastyryldy.
Pýnkterde júk jinaý jumystary 4 – 9 mamyr aralyǵynda qalalar men aýdandardaǵy jastar resýrstyq ortalyqtarynyń bazasynda jáne iri azyq-túlik dúkenderi men bazarlardyń aldynda júrgizildi.
Gýmanitarlyq júktiń ishinde uzaq saqtalatyn azyq-túlikter, kiim-keshekter men tósek-jabdyqtar, dári-dármekter jáne gigienalyq quraldar qamtyldy.
Alǵashqy gýmanitarlyq kómek 7 mamyr kúni Maqtaaral aýdanynan eń shalǵai óńir — Jańaózen qalasynan jóneltildi. 7 gazel avtokólikpen jalpylai eseptegende 7,5 tonnaǵa jýyq gýmanitarlyq júk jiberildi.
Ekinshi gýmanitarlyq kómek 9 mamyr kúni Aqtaý qalasynan jáne Beineý, Munaily, Qaraqiia aýdandarynan jiberildi. 2 fýra jáne 14 gazel avtokólikpen jalpylai eseptegende 70 tonnaǵa jýyq gýmanitarlyq júk maqtaaraldyqtarǵa jóneltildi.
«Jalpylai alǵanda, osy aralyqta 77,5 tonnaǵa jýyq gýmanitarlyq júk Mańǵystaý jurtshylyǵy atynan túrkistandyqtarǵa jetkizildi», - dedi Nurtas Sali.
Búgingi kúni Túrkistan oblysynda arnaiy júk jinaý qoimalary uiymdastyrylyp, turǵyndarǵa taratý jumystary júrgizilýde.
