Taiaýdan beri elordamyzdyń qasbetterinde qala turǵyndarynyń nazaryn aýdaratyn túrli graffiti men keskindemeler paida bola bastady. Bul joly sýretteý óneriniń has sheberleri qazaqstandyq áielderge arnalǵan mýraldy jasap shyǵardy. Keskin «Tse Art Destination» zamanaýi óner galereiasynyń Instagram paraqshasynda jariialandy, dep habarlaidy QazAqparat.
«Máńgilik» atty mýraldyń avtory – Beibit Ásemqul.
«2020 jyly bizdiń elordanyń qasbetterinde ádette sirek kezdesetin áielderge keskinin salar ýaqyt keldi. Dástúrli kóshpeliler mádenietinde áielderdiń róli erekshe bolǵan. Olar oshaq iesi bolýmen qatar, el basyna kún týǵanda atqa qonyp, jaýyngerlik qyryn da tanyta bilgen. Kóptegen folklorlyq shyǵarmalarda jaýynger beinesindegi áielder týraly ańyzdar aitylady. Bul kóshpeli mádeniettegi áielderdiń ózin-ózi taný úshin túrli múmkindikterge ie bolǵandyǵyn dáleldeidi», - delingen habarlamada.
Joba avtorlarynyń aitýynsha, shyǵarma jeke tarihi tulǵaǵa emes, qazaq áielderine arnalǵan. Keskinde sáýkeledegi jas kelinshek pen kimeshegi uzartylǵan, júzinen danalyq rýhy esken áiel beinelengen. Mifologiia men mádeniet arqyly sýretshi Beibit Ásemqul barlyq analar men balalardy qorǵaityn Umai ananyń beinesin jasap shyǵarǵan.
«Bul jumystar «Máńgilik» seriiasy boiynsha jasalǵan. Men jobany 2016 jyly oilastyrǵan edim. Ony anama jáne barlyq qazaqstandyq názik jandylarǵa arnadym. Seriia boiynsha monýmentaldy mýral salýdy usyndym. Biz kóbinese erlerdiń tulǵasyna nazar aýdaramyz. Endi áielderge qurmet kórsetetin kez keldi», - deidi sýretshi Beibit Ásemqul.
