Dostyq úiinde Túrki akademiiasy jáne Qazaqstan halqy Assambleiasynyń uiymdastyrýymen «Bekem baýyrlastyq bailanystar: Manastan Abaiǵa deiin» atty alqaly jiyn ótti, dep habarlaidy QazAqparat.
Shara barysynda Halyqaralyq Túrki akademiiasy daiyndaǵan «Manas» eposynyń qazaq tilindegi nusqasy jáne Abai shyǵarmalarynyń qyrǵyz tilindegi akademiialyq basylymy tanystyryldy.
«Qazaqstan halqy Assambleiasynyń 25 jyldyǵyna orai eki súiinshi jańalyǵymyz bar. Bul baýyrlastyq bailanysymyzdy bekemdei túsetin rýhani qazynalarmen tolyǵyp jatyr. 1961 jylǵy Muhtar Áýezovtiń basshylyǵymen jaryq kórgen «Manas» dastany 60 jyldan keiin qazaq oqyrmandarynyń qolyna qaita jetip otyr. Jyrshy, manasshy Baianǵali Álimjanov óziniń keremet sheberligimen qazaqshalap shyqty», - deidi Túrki akademiiasynyń prezidenti Darhan Qydyráli.
Sondai-aq, biyl uly Abaidyń 175 jyldyǵy.
«Bul qazaq elinde ǵana emes, baýyrlas túrki jurttarynda da keńinen atap ótilýde. Sonyń bir jarqyn aiǵaǵy – Abai tek qana qazaqtyń aqyny emes, qyrǵyzǵa da ortaq tulǵa retinde akademiialyq tańdamaly jinaǵy birinshi ret jaryq kórip otyr. Túrik akademiiasy osy eki eńbekti sizderge usyný mártebesine ie boldy», - deidi ol.
Jiyn bastalǵan kezde atalǵan eki eńbektiń tusaýy kesildi.
