Biyldan bastap belgili bir sanattaǵy azamattar stomatologiialyq kómekke eldegi kez kelgen emdeý uiymy arqyly qol jetkize alady. Buǵan qańtardan bastap engizilgen mindetti áleýmettik meditsinalyq saqtandyrý júiesi múmkindik berip otyr, dep habarlaidy "Ult aqparat".
«Áleýmettik meditsinalyq saqtandyrý qory» kommertsiialyq emes AQ Almaty qalalyq filialynyń direktory Nurlybek Qabdyqaparovtyń aitýynsha, 2020 jyldan bastap stomatologiialyq qyzmet aqysyn tóleý shemasy ózgerdi.
Buryn qyzmet aqysy konsýltativtik-diagnostikalyq qyzmet kórsetetin klinikaǵa tikelei aýdarylatyn bolsa, biyldan bastap emhanalar arqyly tólenedi. Ol úshin emdeý uiymdary arasynda qosymsha kelisimshart bekitiledi.
«Saqtandyrý engizilgenge deiin stomatologiialyq kómek tek patsienttiń tirkelgen emhanasy arqyly ǵana kórsetiletin. Jańa júieniń arqasynda atalǵan sanattaǵy azamattar bul qyzmetti elimizdiń kez kelgen jerinde paidalana alady. Mysaly, qańtar aiynda almatylyq patsientterge Mańǵystaý, Aqtóbe, Jambyl, Almaty oblystarynyń, Nur-Sultan jáne Shymkent qalalarynyń emdeý mekemelerinde stomatologiialyq qyzmetter kórsetilgen. Iaǵni, patsient tisin qai jerde emdetse, aqsha sol klinikaǵa túsedi», - dedi Nurlybek Qabdyqaparov.
MSQ qalalyq filialy málimetine súiensek, biyldan bastap azamattardyń jekelegen sanattary, dálirek aitqanda, 18 jasqa deiingi balalar men júkti áielder ambýlatoriia deńgeiindegi stomatologiialyq kómekti saqtandyrý paketi arqyly ala alady. Olar: tisti jansyzdandyrý, plomba salý, terapevtiń qabyldaýy, pýlpit pen periodontitti emdeý, gipoplaziia men fliýoroz saldarynan anatomiialyq pishini buzylǵan tisti tolyq qalpyna keltirý syndy taǵy da basqa qyzmetterdi paidalana alady. Sonymen qatar, tisti juldyrý, til men erin júgenshigindegi aqaýdy joiý, jaqty rentgenge túsirý, anesteziia syndy qyzmetter de osy paket sheńberinde kórsetiledi.
Al, shuǵyl stomatologiialyq kómek burynǵysha memleket tarapynan kepildendirilgen tegin meditsinalyq kómek paketinde qaldyryldy. Shuǵyl kómekke 18 jasqa deiingi balalar, júkti áielder, Ekinshi dúniejúzilik soǵysyna qatysýshylar, 1,2,3 toptaǵy múgedekter, «Altyn alqa», «Kúmis alqa» ielengen kóp balaly analar, ataýly áleýmettik kómek alýshylar, jasyna qarai zeinetke shyqqandar, juqpaly, áleýmettik mańyzy bar aýrýlar men qorshaǵan ortaǵa qaýip tóndiretin syrqattarǵa shaldyqqan patsientter júgine alady. Mysaly, hirýrgtiń qabyldaýy, tisti julý, abstsesti ashyp tazartý, odontegendi isikti kesip alyp tastaý, alveolitti emdeý, tis tamyry nevritin emdeý, aýyz qýysyndaǵy jumsaq tinderdi kesip alyp tastaý, jaq-bet súiegindegi jaralardy emdeý taǵy basqa qyzmetter tegin. Sondai-aq, jaq-bet súiegi aqaýymen týǵan nárestelerge arnalǵan ortodontiialyq kómek túrleri de memlekettik tapsyrys sheńberinde kórsetiledi.
Jalpy, qazir Almaty qalasynda 75 bastapqy meditsinalyq-sanitarlyq kómek kórsetetin 75 klinika (emhana) tirkelgen. Onyń 23-i stomatologiialyq kómekke beiimdelgen. Taǵy 9 klinika qosymsha kelisimshart negizinde stomatologiialyq qyzmet kórsetedi.
«Jańa júie patsienttiń stomatologiialyq klinikany tańdaýyna múmkindik berip otyr. Biraq azamattardyń kóp jaǵdaida óz quqyqtaryn bilmei jatatyny da jasyryn emes. Ókinishke orai, patsientterdiń stomatologiialyq klinikany tańdaý quqyǵyn barlyq emhanalar birdei saqtai bermeidi. Sebebi, patsient tańdaýdy tirkelgen emhanasy arqyly jasaidy, qyzmet aqysy da sol emhana arqyly tólenedi. Sondyqtan biz patsient quqyǵyn qorǵaý maqsatynda barlyq klinikalarmen jan-jaqty jumys istep jatyrmyz», - dedi filial basshysy.
Meditsinalyq kómek kórsetý barysynda quqyǵy buzylǵan turǵyndar Meditsinalyq saqtandyrý qorynyń 1406 bailanys nómirine shaǵymdana alady.
