Áleýmettik meditsinalyq saqtandyrý qoryna syrtqy saraptama júrgiziledi. Bul týraly QR Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov aitty, dep habarlaidy "Ult aqparat".
«Tek densaýlyq saqtaý ǵana emes memlekettik basqarýdyń ózge de salalary belgili bir dárejede jemqorlyqqa jol berip alady. Al densaýlyq saqtaý salasyna qatysty aitar bolsam, taiaýda «SQ-Farmatsiia» JShS qyzmetindegi jemqorlyq táýekelderge syrtqy saraptamany aiaqtadyq. Jemqorlyq táýekelderdi tómendetý, jalpy dárilik zattar men meditsinalyq maqsattaǵy buiymdardyń biryńǵai distribiýtory qyzmetiniń tiimdiligin arttyrý boiynsha keshendi usynystar engizildi. Kúni keshe ǵana birlesken buiryqqa qol qoiylyp, endi Áleýmettik meditsinalyq saqtandyrý qoryna syrtqy saraptama bastaimyz», - dedi ol Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, agenttik qyzmetkerleri Densaýlyq saqtaý ministrliginiń, atalǵan qordyń mamandarymen birlesip, uiym qyzmetindegi jemqorlyq táýekelderdi joiý máselelerin qarastyratyn bolady.
«Indet kezinde elimizdiń birqatar óńirinde ókpeni jasandy jeldetý apparattaryn joǵary baǵamen satyp alýdyń birneshe faktisi anyqtaldy. Biz bul aqparatty jan-jaqty jetkizdik. Tolyqtai alǵanda, kez kelgen saladaǵydai táýekelder, zańbuzýshylyqtar bar. Biraq, olardy jappai oryn alyp jatyr deýge bolmaidy. Memlekettik qyzmetshilerdiń basym bóligi adal, parasatty adamdar», - dedi Oljas Bektenov.
