Mindetti áleýmettik meditsinalyq saqtandyrý júiesi iske qosylǵan alǵashqy aida elimizde halyqqa kórsetilgen konsýltativtik-diagnostikalyq qyzmet sany 2019 jyldyń qańtarymen salystyrǵanda 27% artty. Atap aitqanda, KT jáne MRT qyzmetin tutyný kólemi 54%, ÝDZ – 21% ósken. Bul týraly búgin «Áleýmettik meditsinalyq saqtandyrý qory» KEAQ Almaty qalalyq filialynyń direktory Nurlybek Qabdyqaparov málimdedi, dep habarlaidy "Ult aqparat".
Filial basshysynyń aitýynsha, 2020 jyly baǵasy qymbat bolyp keletin kompiýterlik tomografiia, magnitti-rezonanstyq tomografiia, stomatologiia syndy qyzmetterge aqy tóleý shemasy ózgerdi. Buryn qyzmet aqysy konsýltativtik-diagnostikalyq kómek kórsetetin klinikaǵa tikelei aýdarylatyn bolsa, biyldan bastap emhanalar arqyly tólenedi. Ol úshin qosymsha kelisimshart bekitiledi. Buǵan deiin KT, MRT, PTsR, IFA-analiz syndy zertteýler tek áleýmettik az qamtylǵan turǵyndarǵa ǵana tegin kórsetilip kelse, biyldan bastap bul múmkindikti saqtandyrylǵan azamattar da paidalana alady.
«2019 jyly Almaty qalasynda densaýlyq saqtaý salasyna 119,3 mlrd teńge bólindi jáne berilgen qarjy tolyq igerildi. Bekitilgen jospar boiynsha, 2020 jyly 182,2 mlrd teńgeniń qyzmeti satyp alynbaq. Onyń 110,7 mlrd teńgesi – tegin meditsinalyq kómek paketine, 71,4 mlrd teńgesi – saqtandyrý paketine tiesili. Iaǵni, jańa reforma men tarifterdi teńestirý nátijesinde biyl Almaty qalasynyń densaýlyq saqtaý salasyna jumsalatyn qarajat 1,5 ese artyp otyr», - dedi Nurlybek Qabdyqaparov.
Búgingi tańda Almaty qalasy boiynsha 173 meditsina uiymy qormen kelisimshart bekitken. Onyń 144-i tegin meditsinalyq kómek paketi sheńberinde qyzmet kórsetedi. Memlekettik tapsyrysty oryndaityn emdeý uiymdarynyń 51% – jeke menshik klinikalar.
Mindetti saqtandyrý paketi boiynsha 152 meditsina uiymymen kelisimshart bekitilgen. Onyń 55% – jeke menshik.
«Qazir qyzmet kórsetýshi klinikalarmen saqtandyrý paketine engen meditsinalyq qyzmetterdi tolyqqandy kórsetý baǵytynda jumys júrip jatyr. Sebebi, biyldan bastap qos paket sheńberinde kórsetiletin qyzmet kólemi edáýir artty. Mysaly, búgingi kúni Almaty qalasynda patsient densaýlyǵyn qalpyna keltirý jáne ońaltýmen ainalysatyn emdeý nysandarynyń sany 62-ge jetti. Ótken jyly memlekettik tapsyrys boiynsha ońaltý qyzmetin kórsetetin emdeý uiymdarynyń sany tórteý ǵana bolatyn», - dep atap ótti Almaty qalalyq Qoǵamdyq densaýlyq basqarmasy jetekshisi Tileýhan Ábildaev.
Onyń aitýynsha, qaladaǵy barlyq emhanalar men klinikalar tegin meditsinalyq kómek jáne MÁMS paketterine engen qyzmetterdi kórsetýge qajetti infraqurylymmen jabdyqtalǵan.
«Meditsinalyq saqtandyrý qorymen jumys isteitin emdeý oryndarynyń bári patsientterge yńǵaily bolýy úshin tólem terminaldaryn ornatyp jatyr. Mundai apparattar saqtandyrylmaǵan azamattardyń jarnany ǵimarattan shyqpai-aq tólep, birer sátte júiege enýine múmkindik beredi», - dep qorytty T.Ábildaev.
