Elimizde mindetti áleýmettik meditsinalyq saqtandyrý júiesi tolyǵymen 1 shildeden bastap iske qosylady. Qazirgi ýaqytta barlyq qazaqstandyqtar shartty saqtandyrylǵan dep sanalady. Bul týraly Almaty qalasy «Áleýmettik meditsinalyq saqtandyrý qory» KEAQ filialynyń direktory Nurlybek Qabdyqaparov málimdedi, dep habarlaidy QazAqparat.
«Sáýir aiynan bastap elimizde mindetti áleýmettik meditsinalyq saqtandyrý júiesi tolyqqandy iske qosylýy tiis bolatyn. Biraq memleket basshysynyń koronavirýs indetine bailanysty bergen tapsyrmasyna sáikes, bul merzimdi 1 shildege aýystyrý týraly sheshim qabyldandy. Iaǵni, osy ýaqytqa deiin Qazaqstannyń barlyq turǵyndary shartty túrde saqtandyrylǵan bolyp sanalady», - dedi Nurlybek Qabdyqaparov.
Sonymen qatar, ol bul elde turatyn árbir azamattyń tegin meditsinalyq kómek túrin ǵana emes, meditsinalyq saqtandyrý paketindegi qyzmetterdi de paidalanýyna múmkindik beretinin aitty. Jalpy alǵanda, bul múmkindikti 2,5 millionnan astam adam paidalanady.
«Qor óziniń ishki rezervinen 20 mlrd teńgeden astam qarjy bólýdi josparlap otyr. Ol saqtandyrylmaǵan azamattardyń kompiýterlik tomografiia, magnitti-rezonanstyq tomografiia, PTsR syndy qymbat analizderge degen suranysyn qanaǵattandyrýǵa jumsalmaq. Qazir elimizde barlyǵy 16,4 millionǵa jýyq adam saqtandyrylǵan bolyp sanalady. Onyń 11 millionǵa jýyǵy áleýmettik jaǵynan az qamtylǵan sanattar. Iaǵni, halyqtyń jartysynan kóbi biýdjet esebinen saqtandyrylyp otyr, - dedi ol.
Spikerdiń aitýynsha, meditsinalyq saqtandyrý qory 2020 jylǵa respýblika boiynsha 1 250-den astam meditsina uiymymen kelisimshart bekitken, onyń 600-den astamy jekemenshik uiym. Jetkizýshilermen bekitilgen kelisimsharttyń jalpy somasy 1,3 trln teńge. Al Almaty qalasy boiynsha biyl 182,2 mlrd teńgeniń qyzmetin satyp alý kózdelgen. Onyń: 110,7 mlrd teńgesi – tegin meditsinalyq kómek paketine, 71,4 mlrd teńgesi – saqtandyrý paketine tiesili.
«Esterińizge sala ketsem, Qazaqstanda mindetti áleýmettik meditsinalyq saqtandyrý júiesi 2020 jyldyń basynda engizildi. Áýelde jyldyń bastapqy úsh aiy ótpeli kezeń retinde jariialandy. Sebebi, jańa júie bolǵandyqtan ártúrli suraqtardyń týyndaityny ras. Ótpeli kezeń osyndai máselelerdi sheship, turǵyndardyń jańa júieni baǵalap, onyń artyqshylyǵyn sezinýi úshin engizilgen bolatyn. Degenmen, bul Qazaqstan azamattary men osynda turaqty turatyn sheteldikterdi jarna tóleý mindetinen bosatpaidy. Shildeniń birine deiin saqtandyrylmaǵan turǵyndar MÁMS paketindegi qyzmetterdi paidalana almaidy», - dep qortyndylady Nurlybek Qabdyqaparov.
