QR Premer-Ministri Asqar Maminniń AQSh-qa jumys sapary aiasynda amerikalyq agrobiznes ókilderimen Qazaqstanda et óńdeý kásiporyndaryn jáne sýarý júieleri óndirisin ashý týraly ýaǵdalastyqtarǵa qol jetkizildi, dep habarlaidy "Ult aqparat" primeminister.kz saityna silteme jasap.
A. Maminniń asa iri et ónimderin óndirýshi - «Tyson Foods» kompaniiasynyń basshylyǵy - prezidenti N. Ýaitpen jáne direktorlar keńesiniń tóraǵasy D. Taisonmen kelissóziniń qorytyndysy boiynsha, Qazaqstanda zamanaýi agro-mýltiprotein indýstriiasyn damytý baǵdarlamasyn iske asyrý týraly kelisimge qol qoiyldy.
Bul qujat birinshi kezeńde QR-da qýattylyǵy táýligine 2 myńǵa jýyq mal basyn quraityn zamanaýi et óńdeý keshenin salýdy qarastyrady. Kásiporyn qazaqstandyq naryqtyń qajettilikterin ótep qana qoimai, ónimdi shetel naryqtaryna eksporttaýǵa múmkindik beredi. Osylaisha, eldegi jyldyq aýyl sharýashylyǵy kirisin 1 mlrd dollardan astam somaǵa qamtamasyz etýge yqpalyn tigizedi.
«Tyson Foods» - Qazaqstanǵa et óńdeýdi damytýǵa jáne fermerlik sharýashylyqtardyń mal basyn arttyrýǵa serpin berýi úshin qajetti tájiribesi bar álemdik deńgeidegi kompaniia. Kásiporyndy ashý et indýstriiasynyń ǵana emes, AÓK-tiń basqa da shektes salalaryn - veterinariiany, agrarlyq mashina jasaýdy, mal azyǵy daqyldaryn ósirýdi, mal bordaqylaý alańdaryn ashýdy jáne taǵy basqasyn yntalandyratyn bolady. Joba Qazaqstannyń aýyl sharýashylyǵynda ondaǵan myń jańa jumys ornyn qurýǵa múmkindik beredi», - dedi A. Mamin.
«Tyson Foods» 1935 jyly qurylǵan, kompaniia ainalymy 42,4 mlrd dollardy quraidy, jumyskerler sany - 141 myń adam.
«Tyson Foods» qazaqstandyq «Kusto Group» kompaniiasymen birlesken jobany júzege asyrady. Óndiristik tsiklde qazaqstandyq fermerlerge «Ekstenshn» amerikandyq qyzmetiniń úlgisi boiynsha aqparattyq-konsýltatsiialyq qyzmet kórsetý qoldaýy bar. Onda keńes berý, jergilikti jerlerde kadrlardyń biliktiligin arttyrý jáne kásiptik-tehnikalyq oqytý qarastyrylǵan.
Úkimet basshysy Arkanzas shtatyndaǵy Springdeil qalasyna jáne Nebraska shtatyndaǵy Dakota-Siti qalasyna baryp, «Tyson Foods» kompaniiasynyń óndiristik qýattylyqtarymen, tehnologiialyq protsesimen jáne ǵylymi-zertteý jobalarymen tanysty.
Sondai-aq Omaha qalasynda Premer-Ministr Nebraska shtatynyń gýbernatory D.P. Rikettspen jáne sýarý júieleri naryǵyndaǵy kóshbasshy «Valmont Industries» kompaniiasynyń prezidenti S. Kanievskimen kezdesti.
Taraptar mehanikalandyrylǵan sýarý, telekommýnikatsiialar, jańartylatyn energetika, infraqurylymdyq qurylys, sondai-aq agrarlyq ǵylym, bilim salalaryndaǵy yntymaqtastyq perspektivalaryn jáne tájiribe almasý máselelerin talqylady.
Kelissóz qorytyndysy boiynsha, A. Maminniń jáne P. Rikettstiń qatysýymen QR Aýyl sharýashylyǵy ministrligi, «Kusto Group» qazaqstandyq kompaniiasy jáne «Valmont Industries» arasynda Qazaqstan Respýblikasynda tiimdi sýarý jáne aýyl sharýashylyǵyndaǵy ónimdilikti jaqsartý qaǵidattary týraly Kelisimge qol qoiyldy.
Qujat Qazaqstanda 2022 jyly qýattylyǵy jylyna 1 myń mashina forntaldi jáne ainalma sýarýdy quraityn «Valley» irrigatsiialyq júielerin óndirý zaýytyn salýdy qarastyrady. Amerikandyq irrigatsiia tehnologiialary ósimdik sharýashylyǵynyń ónimdiligin arttyryp, aýyl sharýashylyǵyndaǵy sý shyǵynyn 50%-ǵa azaitýǵa múmkindik beredi.
Budan ári Qazaqstandaǵy kásiporyn óndirisin telekommýnikatsiialarǵa, jańartylatyn energiia men infraqurylymdyq qurylysqa arnalǵan jabdyqtar shyǵarýǵa deiin keńeitý josparlanǵan. QR-da óndiriletin ónim otandyq naryq qajettilikterin qamtamasyz etip qana qoimai, syrtqy naryqtarǵa eksporttyq áleýetti damytýǵa jol ashady.
«Valmont Industries» ozyq tehnologiialaryn paidalaný ósimdik sharýashylyǵy jáne mal sharýashylyǵy úshin jem-shóp bazasyn qurýda mýltiplikativti áser beredi», - dedi A. Mamin.
Premer-Ministr Qazaqstannyń 2022 jylǵa qarai sýarmaly jerler kólemin 1,4 mln gektardan 2 mln gektarǵa deiin, al 2030 jylǵa qarai - 3 mln gektarǵa deiin arttyrýdy kózdep otyrǵanyn atap ótti.
«Valmont Industries» bas keńsesin aralaý kezinde Úkimet basshysy kásiporynnyń óndiristik qýattylyqtarymen jáne tehnologiialyq protsesimen tanysty.
