QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda aldaǵy kúzgi-qysqy maýsymǵa daiyndyq barysy qaraldy.
Atqarylyp jatqan jumystar týraly energetika ministri Nurlan Noǵaev, indýstriia jáne infraqurylymdyq damý ministri Beibit Atamqulov, «Samuryq-Qazyna» UÁQ» AQ basqarma tóraǵasy Ahmetjan Esimov baiandady, dep habarlaidy "Ult aqparat" primeminister.kz saityna silteme jasap.
2019-2020 jj. jylytý kezeńi shtattyq rejimde ótti. 24 tehnologiialyq buzýshylyq tirkeldi, bul ótken maýsymnan 33 jaǵdaiǵa az. Barlyq tehnologiialyq buzýshylyq normativtik merzimde joiyldy. Jylý jelileriniń temperatýralyq kestesin saqtamaǵan 48 jaǵdai tirkeldi, bul ótken jylmen salystyrǵanda 20%-ǵa az.
Aldaǵy kúzgi-qysqy maýsymǵa daiyndyq aiasynda elimizde 8 energetikalyq blokty, 59 qazandyq pen 44 týrbinany jóndeý, sondai-aq kommýnaldyq-turmystyq sektor men halyq úshin naryqta kómirdiń bolýyn qamtamasyz etý kózdelgen.
Úkimet basshysy óńirlerdiń ákimdikterine aldaǵy jylytý maýsymyna sapaly daiyndyq sharalaryn kúsheitýdi, barlyq josparlanǵan jóndeý jumystaryn ýaqytyly aiaqtaýdy jáne turǵyn úi-kommýnaldyq sharýashylyq, densaýlyq saqtaý jáne áleýmettik salanyń barlyq nysanynyń jylytý maýsymyna daiyndyǵyn qamtamasyz etýdi tapsyrdy.
«Turǵyndardy kómirdiń qajetti kólemimen, JEO men qazandyqtardy otynmen aldyn ala qamtamasyz etý jumystaryn uiymdastyrý kerek. Kómir baǵasyn erekshe baqylaýǵa alyp, otynnyń, ásirese, turǵyndar úshin kómir baǵasynyń negizsiz ósýine jol bermeý sharalaryn qabyldaý kerek», — dedi A. Mamin.
Ákimdikterge biylǵy 1 naýryzǵa deiin jinalǵan kommýnaldyq qyzmetter úshin tutynýshylardyń debitorlyq bereshegin tómendetý boiynsha sharalar qabyldaý, derbes jylytý júielerin turǵyn úi jáne qoǵamdyq úi-jailardan tys jerlerge shyǵarýdy qamtamasyz etý, iesiz elektr jelilerin anyqtaý jáne balansqa qabyldaýdy jalǵastyrý, sondai-aq kommýnaldyq jelilerdi energiia berýshi uiymdardyń teńgerimine berýdi qolǵa alý tapsyryldy.
Energetika, Indýstriia jáne infraqurylymdyq damý ministrlikterine aldaǵy jylytý maýsymyna daiyndyq barysyna pármendi baqylaý men monitoring júrgizýdi qamtamasyz etý tapsyryldy.
