Búgin Úkimet otyrysynda eńbek salasynyń túiitkildi máseleleri qaralyp, Eńbek jáne halyqty áleýmettik qorǵaý ministrliginiń eńbek qatynastaryn retteý sharalary týraly usynystaryna qoldaý bildirildi, dep habarlaidy "Ult aqparat" primeminister.kz portalyna silteme jasap.
QR Premer-Ministri A. Mamin áleýmettik-eńbek qatynastaryn retteýdiń tiimdi júiesin qurý qajettigin atai otyryp, óńirlerdiń ákimderine eńbek ujymdarynda áleýmettik qaqtyǵystardyń týyndaýyna jol bermeý máselesin baqylaýda ustaýdy tapsyrdy.
«Jumysshylardyń negizsiz bosatylýyna jol bermeý kerek. Olardyń áleýmettik kóńil-kúiin jaqsartý — Prezident saiasatynyń negizi baǵyty. Úkimet áleýmettik qaqtyǵystarǵa jol bermeý boiynsha jumystar júrgizip jatyr», — dedi Premer-Ministr.
A. Mamin kásiporyndarda jumysshylardyń eńbek jáne áleýmettik máselelerin durys sheshýdiń mysaldaryn da keltirip ótti.
Kóptegen kompaniialar Memleket basshysynyń jalaqysy tómen jumysshylardyń eńbek aqysyn arttyrý jónindegi bastamasyna qoldaý bildirdi. Osyǵan bailanysty, Premer-Ministr eldiń barlyq óńirlerinde oń tájiribeni belsene qolǵa alýdy tapsyrdy.
Óz kezeginde, Eńbek jáne halyqty áleýmettik qorǵaý ministrligine Kásipodaqtar federatsiiasy men «Atameken» palatasynyń búgingi otyrysta aitylǵan usynystaryna muqiiat qarap, bir ortaq sheshimge kelý tapsyryldy.
«Úshjaqty komissiialardyń jumys formatyn qaita qaraý kerek, ásirese óńirlerde. Olar belsendi jumys jasaýlary qajet. Bul oraida formalizmge jol berýge bolmaidy», — dep atap ótti A. Mamin.
Sonymen qatar, Premer-Ministr eńbek qaýipsizdigin qamtamasyz etýdiń asa mańyzdylyǵyn atap ótti. Osyǵan orai, Eńbek jáne halyqty áleýmettik qorǵaý ministrligine tiisti memlekettik organdarmen jáne kásipodaqtarmen birlesip bir ai ishinde eńbek qaýipsizdigi boiynsha bes jylǵa arnalǵan keshedi Jol kartasyn ázirleý tapsyryldy.
