Premer-Ministr Asqar Mamin jem-shóp daiyndaý máseleleri jóninde keńes ótkizd, dep habarlaidy "Ult aqparat" Úkimet basshysynyń baspasóz qyzmetine silteme jasap.
Jem-shóp daiyndaý boiynsha qazirgi jaǵdai men qabyldanyp jatqan sharalar týraly aýyl sharýashylyǵy ministriniń mindetin atqarýshy Erbol Qarashókeev, óńirlerdegi ahýal týraly Atyraý oblysynyń ákimi Mahambet Dosmuhambetov, Qyzylorda oblysynyń ákimi Gúlshara Ábdiqalyqova, Mańǵystaý oblysynyń ákimi Serikbai Trumov, Shyǵys Qazaqstan oblysynyń ákimi Danial Ahmetov, Soltústik Qazaqstan oblysynyń ákimi Qumar Aqsaqalov, Túrkistan oblysynyń ákimi Ómirzaq Shókeev, Batys Qazaqstan oblysynyń ákimi Ǵali Isqaliev, sharýalardy janar-jaǵarmai materialdarymen qamtamasyz etý týraly energetika vitse-ministri Áset Maǵaýov, sýmen qamtamasyz etý jáne erekshe qorǵalatyn aýmaqtarda shabyndyqtar bólý týraly ekologiia, geologiia jáne tabiǵi resýrstar vitse-ministri Serikqali Brekeshev baiandady.
Jem-shóp daiyndaý máselelerin jedel sheshý jáne oǵan turaqty monitoring júrgizý maqsatynda Aýyl sharýashylyǵy ministrliginiń janynan Respýblikalyq jedel shtab jumys isteidi. Óńirlerde jem-shóp daiyndaý josparlary aiqyndaldy. Biylǵy 18 shildedegi jaǵdai boiynsha 10,6 mln tonna shóp nemese josparlanǵan kólemniń 44%-y daiyndaldy. Qosymsha 1,6 mln tonna pishendeme, 2,1 mln tonna súrlem, 4,8 mln tonna saban jáne 6 mln tonna qunarly jem daiyndalady. Shóp shabýdy uiymdastyrý úshin 255,8 myń ga alańdy quraityn orman alqaby aýmaqtary usynyldy. 6,5 myń shabyndyq brigadasy uiymdastyryldy, ákimdikter 41,4 myń tonna janar-jaǵarmai materialdaryn jeńildikti baǵamen qaita bóldi. «Azyq-túlik kelisimshart korporatsiiasy» UK» AQ 170 myń tonna kóleminde 4-5 sanatty arpa men bidai satyp alýdy qarjylandyrdy, qosymsha 30 myń tonna kompaniianyń ishki rezervteri esebinen qaita bólinetin bolady.
«Memleket basshysy Qasym-Jomart Kemeluly Toqaev qazirgi qurǵaqshylyq kezeńinde fermerlerdi jem-shóppen qamtamasyz etý jóninde jedel sheshimder qabyldaý jáne júieli jumys júrgizý boiynsha mindet qoidy», — dedi A. Mamin. Premer-Ministr jem-shóp daiyndaý jumystaryn jandandyrý, shabyndyqtar berý máselelerinde óńiraralyq ózara is-qimyldy nyǵaitý, qurǵaqshylyqtan zardap shekken óńirlerdiń qajettilig úshin jem-shóp qoryn qalyptastyrý qajettigin atap ótti.
A. Mamin halyqqa jem-shópti qoljetimdi baǵamen satý máselesin erekshe baqylaýǵa alýdy tapsyrdy. Osy maqsatta aýyl sharýashylyǵy óndirýshilerimen, un tartý kásiporyndarymen jáne qurama jem zaýyttarymen memorandýmdar jasasý qajettiligi atap ótildi. Jambyl oblysynyń halyqqa qoljetimdi baǵamen shóp pen jemdi satý úshin arnaiy jármeńkeler uiymdastyrý tájiribesi oń baǵalandy. Soltústik óńirlerdiń ákimdikterine sabandy barynsha kóp jinaýdy qamtamasyz etý tapsyryldy.
Premer-Ministr 200 myń tonna kóleminde mal azyǵy daqyldaryn forvardtyq satyp alýǵa «Azyq-túlik korporatsiiasy» UK» AQ úshin Úkimet rezervinen qarajat bólý máselesin qaraýdy tapsyrdy. Ekologiia, geologiia jáne tabiǵi resýrstar ministrligine erekshe qorǵalatyn tabiǵi aýmaqtarda shóp shabý múmkindigin qamtamasyz etý, Energetika ministrligine Aýyl sharýashylyǵy ministrligimen birlesip shóp shabý naýqanyna arzandatylǵan janar-jaǵarmaidy qosymsha bólý tapsyryldy. «Qazaqstan Temir Joly» UK» AQ-ǵa Mańǵystaý jáne Qyzylorda oblystaryna jem-shóp tasymaldaýǵa tómendetilgen tarifti qamtamasyz etý tapsyryldy.
