Premer-Ministr A. Mamin QR Prezidenti janyndaǵy «jasyl ekonomikaǵa» kóshý jónindegi keńestiń otyrysyn ótkizdi, dep habarlaidy "Ult aqparat" Úkimet basshysynyń baspasóz qyzmetine silteme jasap.
QR Premer-Ministri Asqar Maminniń tóraǵalyǵymen Qazaqstan Respýblikasynyń Prezidenti janyndaǵy «jasyl ekonomikaǵa» kóshý jónindegi keńestiń otyrysy ótti.
QR energetika ministri N. Noǵaev QR «jasyl ekonomikaǵa» kóshýi jónindegi 2013-2020 jyldarǵa arnalǵan tujyrymdamanyń Is-sharalar josparyn iske asyrý barysy týraly, Nur-Sultan qalasynyń ákimi A. Kólginov pen Almaty qalasy ákiminiń orynbasary M. Ázirbaev óńirlerdegi ekologiialyq jaǵdaidy jaqsartý jáne «jasyl ekonomikany» damytý sharalary týraly baiandady.
Otyrysqa qatysýshylar Tuńǵysh Prezident – Elbasy N. Nazarbaevtyń bes áleýmettik bastamalarynyń biri — elordany, respýblikanyń soltústik jáne ortalyq óńirlerin gazben qamtamasyz etý úshin «Saryarqa» magistraldy gaz qubyrynyń qurylysyn iske asyrý barysyn qarady.
Nur-Sultan qalasyna gaz qubyrynyń tartylýy aiaqtalý satysynda tur, ony paidalanýǵa berý osy jyldyń 31 jeltoqsanyna josparlanǵan. Sonymen birge, elordada, Qaraǵandy jáne Aqmola oblystarynda gaz taratý jelilerin salý boiynsha daiyndyq jumystary júrgizilip jatyr.
Jańartylatyn energiia kózderin damytý máseleleri talqylandy — elimizde belgilengen qýattylyǵy 938,8 MVt bolatyn 84 JEK nysany jumys isteidi. Osy jyldyń 10 aiynda JEK elektr energiiasyn óndirý kólemi 2018 jyldyń sáikes kezeńimen salystyrǵanda 65%-ǵa artyp, 1,7 mlrd kVt/saǵ qurady.
Jyl basynan beri qýattylyǵy 407,17 MVt bolatyn 16 JEK nysany paidalanýǵa berildi. Jyl sońyna deiin qýattylyǵy 102,8 MVt bolatyn 3 JEK nysany paidalanýǵa beriledi, bul jańartylatyn energiia nysandarynyń jiyntyq qýattylyǵyn 1042 MVt deiin arttyrady. 2020 jyly JEK nysandarynyń sanyn 108 (1610 MVt), 2021 jyly – 119 (2096 MVt) nysanǵa deiin jetkizý josparlanǵan.
QR ulttyq ekonomika ministri R. Dálenov jáne «Jasyl akademiia» ǵylymi-bilim berý ortalyǵynyń direktory B. Esekina QR Úkimeti men EYDU arasyndaǵy kelisim aiasynda Qazaqstandaǵy «jasyl ósim» jónindegi zertteý nátijeleri týraly baiandama jasady.
Atap aitqanda, «EYDU-nyń jasyl ósim kórsetkishteriniń negizindegi ulttyq esebinde» jasyl ekonomikaǵa kóshýdiń zańnamalyq jáne institýtsionaldyq negizderin jetildirý, halyqaralyq standarttarǵa sáikes jasyl ekonomikaǵa kóshý barysyn baǵalaý ádistemesin jáne jańa jasyl indikatorlardy engizýmen statistikalyq eseptilikti jalǵastyrý usynylady.
QR Prezidentiniń janyndaǵy «jasyl ekonomikaǵa» kóshý jónindegi keńes Prezident Jarlyǵymen 2014 jylǵy mamyrda quryldy. Keńes janynda sý resýrstaryn basqarý, aýyl sharýashylyǵyn damytý, energiia únemdeý jáne energiia tiimdiligin arttyrý, elektr energetikasyn damytý, sonyń ishinde jańartylatyn energiia kózderi, qaldyqtardy basqarý, aýanyń lastanýyn azaitý, ekojúielerdi basqarý, turǵyndardyń ekologiialyq mádenietin qalyptastyrý jáne aǵartý máseleleri boiynsha 8 jumys toby bar.
