QR Úkimetiniń otyrysy barysynda Jastar jylyn ótkizý jónindegi jol kartasyna ózgerister men tolyqtyrýlar engizý jobasyn maquldaý qorytyndysy boiynsha Premer-Ministr Askar Mamin birqatar máselelerge kóńil bólý qajettigin tapsyrdy, dep habarlaidy "Ult aqparat".
«Usynylǵan Jol kartasynda jastardy sapaly ári qoljetimdi bilimmen, turǵyn úimen, jumyspen qamtamsyz etýge, jas otbasylardy qoldaýǵa baǵyttalǵan birqatar naqty sharalar kózdelgen. Bul - óte mańyzdy qadam», — dedi Premer-Ministr, kelesi tapsyrmalardy júktei otyryp.
Birinshiden, ákimdikter tiisti ministrliktermen birge jastarǵa jyl saiyn keminde bir myń jaldamaly páter berý quralyn aiqyndaý jónindegi jumysty jedeldetýi kerek.
Ekinshiden, jastardy jumyspen qamtý máselesin baqylaýda ustaý asa mańyzdy. Jastar arasyndaǵy kásipkerlikti damytý qajet. Bul úshin Jol kartasynda jumys istemeitin, ózin-ózi jumyspen qamtyǵan jastarǵa «Jas kásipker» jobasynyń sheńberinde shaǵyn nesieler men granttar berý jóninde birqatar sharalar kózdelgen, atalǵan jobaǵa 32 mlrd teńgeden astam qarjy bólindi.
Úshinshiden, Jol kartasynda «Jas maman» jobasy sheńberinde suranys bar 100 kásip boiynsha 200 oqý ornyn (180 kolledj ben 20 JOO) jańǵyrtýǵa 57 mlrd teńgeden astam qarajat kózdelgen.
Osyǵan bailanysty QR Premer-Ministri A. Mamin Bilim jáne ǵylym ministrligine Eńbek jáne halyqty áleýmettik qorǵaý ministrligimen, óńirlerdiń ákimdikterimen birge osy jobaǵa qatysatyn oqý oryndary men kásipter tizbesin aiqyndaýdy jedeldetýdi tapsyrdy.
Aqparat jáne qoǵamdyq damý ministrligine tiisti memlekettik organdarmen jáne ákimdiktermen birge Jol kartasyn sapaly iske asyrý úshin barlyq qajetti sharalardy qabyldaý tapsyryldy.
