QR Premer-Ministri Asqar Mamin «Tyson Foods» halyqaralyq biznes jónindegi prezidenti Kristofer Langholtspen kezdesý ótkizdi. Kezdesýde Qazaqstanda zamanaýi agro-mýltiprotein indýstriiasyn damytý máseleleri talqylandy, dep habarlaidy "Ult aqparat" Úkimettiń baspasóz qyzmetine silteme jasap.
QR Premer-Ministri A. Maminniń AQSh-qa sapary barysynda 2019 jylǵy jeltoqsanda qol qoiylǵan kelisimge sáikes «Tyson Foods» qazaqstandyq «Kusto Group» kompaniiasymen birlesip Qazaqstanda siyr eti óndirisiniń tolyq tsiklin ashýdy josparlap otyr.
Osylaisha, birinshi kezeńde QR-da ónimdiligi táýligine keminde 2 myń basty quraityn zamanaýi et óńdeý keshenin salý kózdelgen. Kásiporyn qazaqstandyq naryqtyń qajettilikterin qamtamasyz etip qana qoimai, sonymen qatar ónimdi shetel naryqtaryna da eksporttaityn bolady.
Jobany iske asyrý et indýstriiasyn jáne AÓK-tiń basqa da irgeles salalaryn – veterinariiany, agrarlyq mashina jasaýdy, jemshóp daqyldaryn ósirýdi, bordaqylaý alańdaryn qurýdy jáne t. b. damytýdy yntalandyratyn bolady. Qazaqstannyń aýyl sharýashylyǵynda on myńdaǵan jańa jumys oryndary ashylady. Óndiristik tsikl amerikalyq «Ekstenshn» qyzmetiniń modeli boiynsha qazaqstandyq fermerlerge aqparattyq-konsýltatsiialyq qyzmet kórsetýmen súiemeldenetin bolady, bul konsýltatsiia berýdi, jergilikti jerlerde kadrlardyń biliktiligin arttyrýdy jáne kásiptik-tehnikalyq oqytýdy qamtidy.
«Tyson Foods» kompaniiasynyń negizi 1935 jyly qalanǵan, kompaniia ainalymy $43,1 mlrd quraidy, qyzmetkerler sany – 139 myń adam.
