QR Premer-Ministri Asqar Mamin jumys sapary aiasynda Túrkistan qalasynyń infraqurylym nysandarynyń qurylys barysyn tekserdi, dep habarlaidy "Ult aqparat" Úkimet basshysynyń resmi saityna silteme jasap.
Premer-Ministr investitsiialyq jobalardyń — «Kerýen-sarai» kópfýnktsionaldy týristik kesheniniń, JCI halyqaralyq standarty boiynsha salynyp jatqan 570 tósek ornyna shaqtalǵan kópbeiindi aýrýhananyń (2022 jyldyń jazynda paidalanýǵa berý josparlanyp otyr), Qazaq drama teatrynyń, oblystyq ǵylymi-ámbebap kitaphananyń, Tuńǵysh Prezident saiabaǵynyń, dendropark pen botanikalyq baqtyń iske asyrylý barysymen tanysty.
Sondai-aq A. Mamin paidalanýǵa berilgen «Hampton» qonaq úii men Halyqaralyq týrizm ýniversitetin aralap kórdi. Premer-Ministr óńirdiń áleýmettik-ekonomikalyq damýy jáne biyl kóktemde Túrkistan qalasynda ótkizý josparlanyp otyrǵan Túrkitildes memleketterdiń yntymaqtastyq keńesiniń sammitine daiyndyq máseleleri jóninde keńes ótkizdi.
Úkimet basshysynyń qatysýymen Túrkistan oblysynyń ákimdigi, «Artel Electronics» ózbek kompaniiasy jáne «Orbis Kazakhstan» JShS arasynda yntymaqtastyq týraly kelisimge qol qoiyldy. Qujat óńirde as úi plitalary men elektr sý jylytqyshtaryn shyǵaratyn zaýyt salýdy kózdeidi. Qýattylyǵy – jylyna 1 mln birlik tehnika. Josparlanǵan investitsiia kólemi – 36 mlrd teńge. Kásiporyn 2100 jańa jumys ornyn qurýdy qamtamasyz etedi.
2020 jyly Túrkistan qalasynyń negizgi kapitalyna salynǵan investitsiialar 2019 jylmen salystyrǵanda 3,8 ese ósip, 367,6 mlrd teńgeni qurady. Investitsiialardyń negizgi úlesi týrizm, logistika jáne jyljymaityn múlik salalaryna baǵyttaldy. Túrkistan oblysynyń negizgi kapitalyna salynǵan investitsiialar 2020 jyly 703,3 mlrd teńgege jetti (+60%).
Qurylys jumystarynyń kólemi 65,8%-ǵa 299,9 mlrd teńgege deiin ulǵaidy. Oblys investitsiialardyń ósý qarqyny jáne jalpy óńirlik ónimniń ósýi boiynsha jetekshi pozitsiiaǵa ie boldy.
