QR Premer-Ministri Asqar Mamin Minsk qalasyna sapary aiasynda TMD Úkimet basshylary keńesiniń (ÚBK) otyrysyna qatysty, onda pandemiiadan keiingi kezeńde TMD ekonomikasyn turaqty damytýdyń jańa kún tártibin qalyptastyrý qajettigin atap ótti, dep habarlaidy primeminister.kz.
«TMD elderi pandemiiadan keiingi qalpyna kelý kezeńine birtindep kóshýde. Bizdiń ekonomikalarymyz, jetekshi halyqaralyq qarjy uiymdarynyń boljamdary boiynsha, biyl oń ósý traektoriiasyna shyǵady», — dedi A. Mamin.
Úkimet basshysy TMD elderi arasyndaǵy ózara saýda kórsetkishteriniń jaqsarǵanyn atap ótti. Biylǵy qańtar-naýryzda Qazaqstannyń TMD elderimen saýdasy $6,3 mlrd qurady, bul ótken jyldyń sáikes kezeńimen salystyrǵanda 10%-ǵa artyq.
QR Premer-Ministri qosylǵan qundy birlesip qalyptastyrýdy qamtamasyz etý, ony ótkizý naryqtaryna deiin tasymaldaý jáne kórsetilgen protsesterdi qarjylandyrý boiynsha úilestirilgen sharalar qabyldaý qajet ekenin atap ótti. Bul rette yqtimal qaitalanatyn shoktar jaǵdaiynda ekonomikanyń turaqtylyǵyn arttyrý úshin TMD-nyń syrtqy tólem teńgeriminiń ornyqtylyǵyn qamtamasyz etýge, onyń ishinde Dostastyq ishindegi taýar ainalymyn ulǵaitý jolymen qamtamasyz etýge nazar aýdarý qajet.
TMD ekonomikalyq damýynyń jańa kún tártibi aiasynda Qazaqstan Úkimetiniń basshysy Dostastyqtyń ónerkásiptik jáne agroónerkásiptik áleýetin iske asyrýǵa basa nazar aýdarýdy usyndy.
«Azyq-túlik ónimderin óndirýge, óńdeýge, bólýge, retteýge jáne tutynýǵa qatysty sýbektiler men is-sharalardyń búkil spektrin qamtityn TMD elderiniń azyq-túlik qaýipsizdigin qamtamasyz etý strategiiasyn ázirlep, qabyldaý qajet», — dedi A. Mamin.
TMD aiasynda birlesken tiimdi jáne praktikalyq kólik saiasatyn ázirleý men iske asyrýdyń, infraqurylymnyń sapasy men qoljetimdiligin arttyrý boiynsha jumysty jalǵastyrýdyń mańyzdylyǵy atap ótildi.
Úkimet basshysy qalyptasqan iri jahandyq qosylǵan qun tizbekteriniń transformatsiiasynan, dástúrli baǵyttardyń ornyqtylyǵyna qatysty qaýiptenýden jáne jekelegen aimaqtardyń tranzittik áleýetine qatysty belgisizdikten týyndaǵan halyqaralyq kólik aǵyndaryn aýqymdy qaita bólýdi eskere otyryp, TMD-nyń halyqaralyq tasymal naryǵyndaǵy óz úlesin ulǵaitýǵa múmkindigi bar ekenin atap ótti.
«Mundai serpin bizdiń tranzittik kórsetkishterimiz arqyly kórinis berip otyr. 2020 jyly pandemiiaǵa qaramastan, Qazaqstan aýmaǵy arqyly Qytai – Eýropa – Qytai baǵyty boiynsha konteinerlik tasymaldardyń ósýi 59,6% qurady. Osy jyldyń alǵashqy tórt aiynda ósim 84% qurady», — dedi A. Mamin.
Premer-Ministr jobalardy qarjylandyrýdyń jańa tetikterin jáne ónerkásiptik kooperatsiiany tereńdetý, azyq-túlik qaýipsizdigin qamtamasyz etý, jańa birlesken óndiristerdi qurý, kólik-logistikalyq infraqurylymdy damytý jáne investitsiialyq ahýaldy jaqsartý jónindegi sharalardy ázirleýdiń mańyzdylyǵyn atap ótti.
Otyrys qorytyndysy boiynsha halyqty jumyspen qamtýǵa járdemdesý, TMD-ǵa qatysýshy memleketterdiń aýmaqtaryn sanitarlyq qorǵaý, jalǵan taýarlyq belgiler men geografiialyq kórsetkishterdi paidalanýdyń aldyn alý jáne jolyn kesý salalaryndaǵy yntymaqtastyq týraly kelisimder qabyldandy.
TMD ÚBK juqpaly aýrýlardyń taralýyna qarsy is-qimyl jónindegi birlesken is-qimyldardyń ortasha merzimdi josparyn, 2025 jylǵa deiingi kezeńge arnalǵan aýsyldyń aldyn alý jáne oǵan qarsy kúres jónindegi birlesken sharalar keshenin bekitti, sondai-aq memlekettik materialdyq rezervterdi basqarýdaǵy jáne qarýly kúshter ofitserlerin daiarlaýdaǵy yntymaqtastyqty nyǵaitý jóninde sheshimder qabyldady.
TMD aiasyndaǵy ekonomikalyq ózara is-qimyldyń ózekti máseleleri jáne TMD-nyń 2030 jylǵa deiingi kezeńge arnalǵan Ekonomikalyq damý strategiiasynyń birinshi kezeńin iske asyrý jónindegi is-sharalar jospary qaraldy.
Condai-aq otyrysqa Ázerbaijan Premer-Ministri Áli Idaiat oǵly Asadov, Belarýs Premer-Ministri Roman Golovchenko, Qyrǵyzstan Premer-Ministri Ýlýkbek Maripov, Resei Premer-Ministri Mihail Mishýstin, Tájikstan Premer-Ministri Kohir Rasýlzoda, Ózbekstan Premer-Ministri Abdýlla Aripov, Armeniia vitse-premer-ministriniń m. a. Mger Grigorian, Túrkimenstan ministrler kabineti tóraǵasynyń orynbasary Gadyrgeldy Mýshshikov, Moldovanyń Belarýstegi elshisi Viktor Sorochan qatysty.
