Premer-ministr Asqar Mamin Úkimettiń taýarlardy tańbalaý men qadaǵalaý júiesin engizý boiynsha biznes múddesin qorǵap, qajetti sharalar qabyldaýdy jalǵastyratynyn málim etti, dep habarlaidy "Ult aqparat".
«Eýraziialyq ekonomikalyq odaqtyń integratsiialyq protsesteri aiasynda jekelegen taýarlarǵa qatysty tańbalaýdy engizý boiynsha Qazaqstannyń biryńǵai pozitsiiasy qalyptasty. Elimizde teri buiymdary men temeki ónimderi mindetti túrde tańbalanady. Sondai-aq dári-dármek, alkogol, aiaq kiim jáne sút ónimderin tańbalaý boiynsha pilottyq jobalar bastaldy. Biryńǵai operator «Taýarlardy tańbalaý jáne qadaǵalaý» aqparattyq júiesin ázirledi. Taýarlardyń «zańdylyǵyn» tekserý úshin «Naqty Sauda» jáne «Naqty Onim» tegin mobildi qosymshalary engiziledi. Bólshek saýda oryndary skanerlermen jabdyqtalyp jatyr», - degen Úkimet basshysy taýarlardy tańbalaý jáne qadaǵalaý júiesi otandyq naryqty sapasyz ónimnen qorǵap, azamattardyń densaýlyǵyn saqtaýǵa, otandyq taýar óndirýshilerdiń EEO naryǵynda básekege qabilettiligin arttyrýǵa múmkindik beretinin málim etti.
Premer-ministrdiń aitýynsha, jalpy bul júieni tabysty engizý jáne iske asyrý úshin birqatar máselege nazar aýdarý kerek.
«Birinshiden, tańbalanǵan taýarlardyń tizbesin keńeitý jumysyn Eýraziialyq ekonomikalyq odaq memleketterinde taýarlardy tańbalaýdyń engizilý protsesin eskerip júrgizý qajet. Bul kedergisiz ózara saýdany damytýǵa yqpal etedi. Munda baqylaý-sáikestendirý belgilerin ózara taný - mańyzdy másele. Saýda ministrligi bul máseleni erekshe baqylaýda ustap, EEO elderiniń ýákiletti organdarymen belsendi ózara bailanys jasaýy tiis. Ekinshiden, biznes óndiretin taýarlarynyń sapasyn arttyrýǵa, onyń ishinde óz ónimin tańbalaýǵa ózi múddeli bolýy kerek. Tańbalaýsyz sheteldik naryqtarǵa shyǵý múmkindigi bolmaidy», - dedi ol.
Asqar Mamin Saýda jáne integratsiia, Qarjy ministrlikterine taýarlardy osy júiege qatysýshylardyń úilesimdi jumysyn qamtamasyz etýdi, biznes-qoǵamdastyqqa aqparat berýdi tapsyrdy.
«Úshinshiden, taýardyń import nemese óndirilýinen bastap bólshek saýdada satylýyna deiin Qazaqstan aýmaǵynda taralýyn ashyqtyǵyn qamtamasyz etý úshin Taýarlardy qadaǵalaýdyń ulttyq júiesi quryldy. Sonyń arqasynda osy jylǵy 10 aidyń ishinde kedendik baj, qosylǵan qun salyǵy men aktsizderden túsken túsim 132,1 mlrd teńgeni qurady. Al jospar boiynsha 2025 jylǵa deiin kýmýliativtik áser 2,6 trln teńgeni quraidy. Taýarlardy qadaǵalaýdyń ulttyq júiesin engizý adal salyq tóleýshiler úshin biznes júrgizýdiń básekeles jaǵdailaryn arttyrýǵa, óndiris, saýda kólemin ulǵaitýǵa, kóleńkeli ainalymdy azaitýǵa múmkindik beredi. Osyǵan orai, Qarjy ministrligine taýarlardy qadaǵalaýdyń ulttyq júiesin jetildirý jáne tańbalanǵan taýarlardyń ainalymyn baqylaý jumysyn jalǵastyrýdy tapsyramyn», - dedi ol.
Úkimet basshysy sonymen qatar Tsifrlyq damý ministrligine Qazaqtelekommen birlesip, aqparattyq júielerdiń, tegin mobildi qosymshalardyń turaqty jumys isteýin, olardy tehnikalyq qoldaýdy jáne jyldamdyǵy joǵary mobildi internet sapasyn qamtamasyz etýdi júktedi.
«Jalpy Úkimet biznespen birlesip, taýarlardy tańbalaý men qadaǵalaý júiesin engizý boiynsha biznes múddesin qorǵaýdy eskere otyryp, qajetti sharalar qabyldaýdy jalǵastyrady», - dedi ol.
