Sý resýrstaryn basqarý memlekettik baǵdarlamasynyń jobasy ázirlendi. Bul týraly Premer-Ministr Asqar Mamin málim etti, dep habarlaidy "Ult aqparat".
Úkimet basshysy Qazaqstanda sý tutynýdyń 65 paiyzy aýyl sharýashylyǵyna tiesili ekenin jetkizdi.
«Agroónerkásiptik sektordy sapaly ári kepildendirilgen sý kólemimen qamtamasyz etý elimizdiń azyq-túlik qaýipsizdigine tikelei áser etedi. Eldegi jer betindegi sýdyń jartysyna jýyǵy (44,9 km³) kórshiles elder aýmaǵynan keledi. Transshekaralyq ózenderdi paidalaný boiynsha ózara is-qimyldyń negizgi máseleleri úkimetaralyq kelisimder aiasynda rettelgen. Biylǵy jeltoqsan aiynda Jaiyq jáne Ertis ózenderi ekojúielerin saqtaý jáne qalpyna keltirý jóninde Qazaqstan-Resei yntymaqtastyǵy baǵdarlamalary qabyldandy. Baǵdarlamalarda sý almasýdy jaqsartý úshin sý jiberý qurylystaryn rekonstrýktsiialaý sharalary da kózdelgen», - dedi Mamin Úkimet otyrysynda.
Onyń aitýynsha, sýdy tiimdi paidalanýdyń mańyzdy máseleleri qarastyryldy.
«Sý resýrstaryn basqarý memlekettik baǵdarlamasynyń jobasy ázirlendi. Qujat sý infraqurylymyn salýdy, jańǵyrtýdy jáne jetildirýdi, sýarýdyń sý únemdeý tehnologiialaryn engizýdi, sýdy esepke alý men bólýdi tsifrlandyrýdy kózdeidi. Atalǵan is-sharalardy ótkizý sý shyǵynyn azaitýǵa múmkindik beredi», - dedi Premer-Ministr.
