QR Premer-Ministri Asqar Mamin jumys sapary aiasynda Shymkent pen Túrkistan qalalarynyń kólik jáne áleýmettik-mádeni infraqurylym nysandarynyń qurylys barysyn tekserdi, dep habarlaidy "Ult aqparat" primeminister.kz saityna silteme jasap.
Shymkentte Úkimet basshysyna biylǵy jeltoqsanǵa deiin salý kózdelgen, ótkizý qabileti saǵatyna 2 myń jolaýshyny quraityn halyqaralyq áýejaidyń jańa jolaýshylar terminalynyń qurylys barysy týraly baiandaldy.
Premer-Ministr Túrkistanda jańa halyqaralyq áýejaidyń jáne oǵan aparatyn avtomobil jolynyń qurylys qarqynymen tanysty. Nysan oblys ortalyǵynan 16 shaqyrym jerde ornalasqan jáne biylǵy qyrkúiek aiynda paidalanýǵa beriledi. Terminaldyń ótkizý qabileti jylyna 3 mln jolaýshyny quraidy dep kózdelgen.
A. Mamin Kongress-holdyń, 7 myń orynǵa shaqtalǵan stadionnyń, Oqýshylar saraiynyń, basseini bar sport kesheniniń, attraktsiondary bar qala saiabaǵynyń, drama teatrynyń, oblystyq ǵylymi-ámbebap kitaphananyń, «Uly dala eli» ortalyǵynyń, Q. A. Iasaýi mýzeiiniń jáne Tuńǵysh Prezident saiabaǵynyń qurylys alańdarynda bolyp, Uly Jibek joly qolónershileriniń ulttyq ortalyǵynyń ǵimaratyn rekonstrýktsiialaý barysyn tekserdi.
Úkimet basshysy árqaisysy 120 bólmeden turatyn «Rixos Turkestan» jáne «Hampton by Hilton» qonaqúileriniń, sondai-aq «Sembol construction» túrik kompaniiasy salyp jatqan «Kerýen sarai» kópfýnktsionaldy týristik kesheniniń qurylysy barysymen tanysty. Atalǵan barlyq qonaq úi-týristik nysandaryn osy jyly paidalanýǵa berý josparda bar.
Sondai-aq Premer-Ministrge «Áziret Sultan» mýzei-qoryǵyn abattandyrý jospary tanystyryldy.
