Úkimet basshysy Asqar Mamin elde koronavirýs infektsiiasynyń qaitadan órship ketpeýi úshin birqatar shara qabyldaýdy tapsyrdy, dep habarlaidy "Ult aqparat".
«Jalpy eldegi sanitariialyq-epidemiologiialyq jaǵdai turaqtaldy. Virýstyń reprodýktivtik deńgeii 0,93 qurap otyr. Bul qabyldanyp jatqan sharalardyń tiimdiligin kórsetedi. Degenmen álemde jáne birqatar shekara mańyndaǵy elderdegi epidemiianyń turaqsyzdyǵyn eskerip, biz sanitariialyq talaptardy saqtaý sharalaryn kúsheitýimiz qajet», - dedi Asqar Mamin Úkimet otyrysynda.
Úkimet basshysy jaýapty ministrlikterge birqatar máselelerge nazar aýdarýdy tapsyrdy.
«Birinshiden, múddeli memlekettik organdar men óńirlerdiń ákimdikteri sanitariialyq-epidemiologiialyq is-sharalardyń 100 paiyz daiyndyǵyn qamtamasyz etsin. Densaýlyq saqtaý ministrligi kóshpeli meditsinalyq keshender men jedel járdem avtokólikterin, qajetti tehnika men jabdyqty, jeke qorǵaný quraldaryn satyp alýyn qamtamasyz etip, olardy 15 qazan aiyna deiin óńirlerge berý boiynsha barlyq qajetti sharalardy qabyldasyn. Ekinshiden, Ishki ister ministrligi men Densaýlyq saqtaý ministrligi ákimdiktermen birge sanitariialyq talaptardyń saqtalýyn baqylaityn monitoring toptarynyń jumysyn kúsheitsin», - dedi ol.
Asqar Mamin sonymen qatar sanitariia rejimin buzýdyń kez kelgen jaǵdaiynyń jolyn kesý qajettigin eskertti.
«Úshinshiden, Densaýlyq saqtaý ministrliginiń Qazaqstanǵa keletin azamattardy sanitariialyq-karantindik baqylaýǵa alýdy kúsheitý jónindegi usynystaryn Vedomstvoaralyq komissiiada qaraýdy tapsyramyn. Tórtinshiden, Densaýlyq saqtaý ministrligi, «SK-Farmatsiia» jáne ákimdiktermen birlesip, meditsina uiymdarynda jáne dárihanalarda dárilik zattardyń jáne jeke qorǵaný quraldarynyń bolýyn qamtamasyz etsin. Óńirlerde dárilik preparattardyń baǵalaryna baqylaý júrgizý qajet», - dedi ol.
Aita keteiik, sanitarlyq-epidemiologiialyq jaǵdai jáne koronavirýs infektsiiasynyń taralýyna jol bermeý boiynsha qabyldanyp jatqan sharalar týraly QR densaýlyq saqtaý ministri A. Tsoi, «SQ-Farmatsiia» basqarma tóraǵasy E. Esqaliev, QR indýstriia jáne infraqurylymdyq damý ministri B. Atamqulov, QR ishki ister ministri E. Turǵymbaev, Premer-Ministrdiń orynbasary R. Skliar jáne t. b. baiandady.
