QR Premer-Ministri Asqar Mamin Resei Federatsiiasynyń ónerkásip jáne saýda ministri Denis Mantýrovpen kezdesý ótkizdi. Bul týraly primeminister.kz saitynda habarlandy.
Kezdesýde kólik qurastyrý, aýylsharýashylyq jáne aviatsiialyq tehnikalardy jasaý, óńirlik servistik ortalyqtardy damytý salalarynda birlesken jobalardy, sondai-aq qorǵanys ónerkásibi kesheni jobalaryn iske asyrý turǵysynan Qazaqstan men Resei kásiporyndary arasynda ónerkásiptik kooperatsiiany damytý keleshegi talqylandy.
Kezdesý barysynda ónerkásip kooperatsiiasy salasynda birlesken is-qimyldar baǵdarlamasyn ázirleý jumystary júrgizilip jatqany atap ótildi.
Baǵdarlama birqatar birlesken investitsiialyq jobalardy iske asyrýdy kózdeidi, onyń ishinde «Kirovets» markasynyń traktorlaryn jáne onyń quraýysh bólikterin «Peterbýrg traktor zaýyty» AQ-men jáne «Agromashholding KZ» AQ-men shyǵarýdy uiymdastyrý, KamAZ markasynyń kólik quraldaryna quraýyshtardy, kerneýi 110 kV deiin bolatyn maily jáne qurǵaq transformatorlardy shyǵarý, tolyq tsikldi avtozaýyt salý boiynsha «AVTOVAZ» JAQ-pen yntymaqtastyqta «Aziia Avto Qazaqstan» AQ jobasyn iske asyrýdy qarastyrady.
QR Premer-Ministri A. Maminniń aitýynsha, «Baǵdarlamany iske asyrý ekijaqty investitsiialyq yntymaqtastyqty damytýǵa, elder arasyndaǵy saýda-ekonomikalyq qatynastardy nyǵaitýǵa eleýli serpin beredi.
