Memleket basshysy Premer-Ministr Asqar Mamindi qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaevqa biylǵy qańtar-naýryz ailaryndaǵy elimizdegi áleýmettik-ekonomikalyq damýdyń qorytyndylary jáne sanitarlyq-epidemiologiialyq ahýal jóninde esep berildi.
Premer-Ministrdiń málimetine sáikes, atalǵan kezeńde ekonomikanyń naqty sektorynda ornyqty damýdyń oń qarqyny baiqalady.
Asqar Mamin Qasym-Jomart Toqaevqa elimizdegi sanitarlyq-epidemiologiialyq ahýal jaiynda baiandady. Aýrýhanalardaǵy juqpaly dertke shaldyqqandarǵa arnalǵan bólimderdiń – 41 paiyzynda, jan saqtaý bólimderdiń – 27 paiyzynda naýqastar em qabyldap jatyr. Sáýir aiynan bastap óńirlerde ai saiyn 2 million adamǵa vaktsina salynady. Qyrkúiek aiynda jalpy 10 million azamatqa ekpe salynyp, vaktsinalaý jumysy aiaqtalady.
Premer-Ministrdiń aitýynsha, densaýlyq saqtaý júiesi qajetti mólsherde dári-dármektermen jáne meditsinalyq jabdyqtarmen tolyq qamtamasyz etilgen. Meditsinalyq mekemelerde dári-dármektiń bir ailyq, al «SQ-Farmatsiia» qoimalary men dárihanalarda eki ailyq qory jinaqtalǵan. Elimizdiń barlyq óńirinde dári-dármekterdiń, qorǵanysh quraldary men shpritsterdiń úsh aiǵa jetetin turaqty qory bar.
Sonymen qatar kezdesý barysynda memlekettik baǵdarlamalardy, Qazaqstannyń Eýraziialyq ekonomikalyq odaqqa tóraǵalyǵynyń basym baǵyttaryn júzege asyrý jáne investitsiia tartý, ekonomika salasyn odan ári tsifrlandyrý, Úkimettiń jumysyna ozyq tsifrlyq sheshimder engizý, halyqty jumyspen qamtýdy qoldaý, áleýmettik mańyzy bar taýarlardyń baǵasyn turaqtandyrý jóninde qabyldanyp jatqan sharalar týraly máseleler talqylandy.
Prezidentke 1 sáýirde ótken OPEK+ ministrler kezdesýiniń qorytyndylary týraly málimet berildi. Onda Qazaqstan úshin munai óndirýdiń táýliktik kólemin qosymsha 6 myń barrelge arttyrýdy kózdeitin arnaiy shart kelisildi. Tiisinshe jyl qorytyndysy boiynsha munai óndirisinde edáýir serpin bolýy tiis.
