QR Prezidenti Qasym-Jomart Toqaev Premer-Ministr Asqar Mamindi qabyldady, dep habarlaidy "Ult aqparat" Aqordanyń resmi saityna silteme jasap.
Prezident Qasym-Jomart Toqaevqa elimizdegi sanitarlyq-epidemiologiialyq jaǵdai, halyqty vaktsinalaý, sondai-aq, áleýmettik-ekonomikalyq damýdyń ózekti máseleleri týraly esep berildi.
Premer-Ministrdiń aitýynsha, eldegi sanitarlyq-epidemiologiialyq jaǵdai turaqtanǵan. Qazaqstan Covid-19 indetiniń taralý qarqyny boiynsha «qyzyl» aimaqtan «sary» aimaqqa ótti. Virýstyń juǵý indeksi – 0,94. Juqpaly aýrýlar bólimsheleri – 33 paiyzǵa, jan saqtaý bólimsheleri – 25 paiyzǵa tolǵan. Vaktsinalaý qarqyny artyp keledi. Qazirgi tańda Qazaqstanda 3 million adamǵa ekpe salynyp, onyń 2 milliony vaktsinanyń birinshi komponentin alǵan. 1 millionǵa jýyq adamǵa ekpeniń ekinshi komponenti salyndy.
Memleket basshysyna 2021 jylǵy Jumyspen qamtý jol kartasy baǵdarlamasynyń oryndalý jospary týraly aqparat berildi. Asqar Mamin Jumyspen qamtý jol kartasyn iske asyrýǵa biyl 300 milliard teńge bólingenin, 35,6 myń jumys orny, onyń ishinde, 20 myńnan astam turaqty jumys orny ashylatynyn atap ótti.
Qasym-Jomart Toqaevqa memlekettik qyzmetshilerge eńbekaqy tóleý júiesiniń pilottyq rejiminiń júzege asyrylýy jóninde baiandaldy. Atalǵan pilottyq jobaǵa 2018 jyly Memlekettik qyzmet isteri agenttigi, Sybailas jemqorlyqqa qarsy is-qimyl agenttigi, Ádilet ministrligi, birqatar óńirdiń ákimdikteri qatysty. Júrgizilgen tájiribeniń nátijesinde jobaǵa qatysýshy memlekettik organdarda kadrlardyń almasýy 4,9 paiyzdan 3,5 paiyzǵa deiin azaiyp, memlekettik qyzmettiń tartymdylyǵy arta tústi (konkýrs 1 orynǵa 3,4 esege artty), ortalyqta jáne aimaqtarda eńbekaqy tóleý alshaqtyǵy 70 paiyzdan 16 paiyzǵa deiin qysqardy.
Memleket basshysy atalǵan jobany jergilikti atqarýshy organdarda sondai-aq, ortalyq memlekettik organdarda aýqymdy túrde júzege asyrýdy tapsyrdy. Sonymen qatar memlekettik qyzmetshilerdiń sanyn kezeń-kezeńimen qysqartý jáne memlekettik apparattyń uiymdyq qurylymyn ońtailandyrý jumystaryn jalǵastyrý kerek. Prezident qurylymdy qaita ózgertý nátijesinde únemdelgen qarjyny eńbekaqy kólemin arttyrýǵa baǵyttaý mańyzdy dep sanaidy.
Budan bólek kezdesýde syrtqy jáne ishki investitsiialardy tartýdy ulǵaitý, shaǵyn jáne orta biznestiń áleýetin arttyrý, qaita óńdeý sektorynyń ósimi men damýy esebinen ekonomikanyń qurylymyn odan ári ártaraptandyrý, elimizdiń áleýmettik-ekonomikalyq damýyna qatysty basqa da ózekti máseleler jóninde qabyldanǵan sharalar qarastyryldy.
