QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda jumyspen qamtýdy qoldaý sharalaryn iske asyrý barysy qaraldy, dep habarlaidy primeminister.kz saity.
Biyl «Eńbek» memlekettik baǵdarlamasynyń, Jumyspen qamtýdyń jol kartasynyń jáne basqa da salalyq baǵdarlamalar aiasynda jumyspen qamtý sharalary 743 myń adamdy qamtydy. Jyldyń sońyna deiin 1 mln 220 myń adamǵa qoldaý kórsetiledi. Memleket basshysynyń tapsyrmasymen Jumyspen qamtýdyń jol kartasy aiasynda turaqty jumys oryndaryn qurýǵa jáne óńirlerdiń áleýmettik infraqurylymyn jaqsartýǵa basa nazar aýdarylyp, infraqurylymdyq jobalardyń tizbesi ońtailandyryldy. Osy jobalar (6 702 joba) aiaqtalǵan soń, aralas salalarda qosymsha 100 myńnan astam turaqty jumys oryndary qurylady.
Premer-Ministr Shymkent qalasynda, Jambyl, Soltústik Qazaqstan jáne Shyǵys Qazaqstan oblystarynda jumyspen qamtýdy qoldaý sharalaryn iske asyrýdyń joǵary qarqynyn atap ótti. Ortasha kórsetkishter Qaraǵandy, Aqmola, Túrkistan, Aqtóbe, Qostanai, Mańǵystaý, Almaty, Pavlodar, Atyraý oblystarynda, Nur-Cultan jáne Almaty qalalarynda baiqalady.
Sonymen qatar jekelegen kórsetkishter boiynsha eki óńir artta qalyp otyr: Qyzylorda oblysynda — memlekettik granttar berý 47,5%, qoǵamdyq jumys – 50,1%, jobalarǵa bólingen qarjyny igerý – 56,2% jáne jumys oryndary qurý – 44,4%. Batys Qazaqstan oblysynda — mikrokredit berý boiynsha tek 28,6%, jastar tájiribesi – 37,7%, jobalarǵa bólingen qarjyny igerý – 58,9% jáne turaqty jumys oryndaryn qurý boiynsha 25,8% deńgeiinde.
«Jyl sońyna deiin tórt ai ǵana qaldy. Ákimdikter baǵdarlamalardy iske asyrý jumystaryn jandandyrýy qajet. Qazirgi jaǵdaida birinshi kezektegi mindet – bul azamattardy jumyspen qamtamasyz etý. Qajetti resýrstar bólingen, barlyq quraldar bar, eńbek naryǵynda teńgerimsizdikterdiń paida bolýyna jol bermeý kerek», — dedi A. Mamin.
Úkimet basshysy memlekettik baǵdarlamalarda qarastyrylǵan is-sharalardy júzege asyrýdy, sondai-aq Elektrondyq eńbek birjasynyń biznes-protsesterin ońtailandyrý, jumyspen qamtý sharalarymen proaktivti qamtýdy damytý jáne olardy iske asyrý monitoringin kúsheitý jóninde sharalar qabyldaýdy tapsyrdy.
Ákimdikterge árbir jumyssyz adamnyń profailyn qurý jáne onymen jumyspen qamtýǵa járdemdesý boiynsha ataýly jumys júrgizý tapsyryldy. Jumyspen qamtýdyń josparlanǵan indikatorlaryna qol jetkizip, turaqty jumys oryndaryn qurýǵa erekshe nazar aýdarý qajet.
Ulttyq ekonomika, aýyl sharýashylyǵy ministrlikterine «Atameken» UKP jáne ákimdiktermen birlesip, biznes bastamalardy damytý jáne qoldaý boiynsha jumysty jandandyrý tapsyryldy.
Jiynda Eńbek jáne halyqty áleýmettik qorǵaý ministri B. Nurymbetov, Shyǵys Qazaqstan oblysynyń ákimi D. Ahmetov, Jambyl oblysynyń ákimi B. Saparbaev, Shymkent qalasynyń ákimi M. Áitenov, Soltústik Qazaqstan oblysynyń ákimi Q. Aqsaqalov, Batys Qazaqstan oblysynyń ákimi Ǵ. Esqaliev baiandama jasady.
