QR Premer-Ministri Asqar Mamin Májilis depýtattarynyń zeinet jasyn tómendetýge qatysty resmi saýalyna jaýap berdi, dep habarlaidy "Ult aqparat".
«Qazirgi ýaqytta zeinetaqymen qamtamasyz etý barlyq úsh deńgeide de (yntymaqty, bazalyq jáne jinaqtaýshy zeinetaqy) eńbek ótiline bailanystyrylǵan. Bul rette yntymaqty zeinetaqynyń mólsheri birtindep tómendeidi. Óitkeni, ony taǵaiyndaý barysynda 1998 jyldyń 1 qańtaryna deiingi ǵana, iaǵni jinaqtaýshy júie engizilgenge deiingi eńbek ótili esepke alynady. Yntymaqty zeinetaqynyń azaiatyn mólsheri mindetti zeinetaqy jarnasyn aýdarý kezeńiniń artýy esebinen zeinetaqynyń jinaqtaýshy bóligi mólsheriniń ósýi arqyly ótelýi tiis. Bazalyq zeinetaqy zeinet jasyna jetken barlyq tulǵaǵa zeinetaqy júiesine qatysý ótiline bailanysty (1998 jylǵa deiin jáne osy datadan keiin de) eń tómengi kúnkóristiń 54-ten 100 paiyzyna deiingi mólsherde beriledi. Iaǵni, uzaq ýaqyt jumys istegen saiyn bazalyq zeinetaqy mólsheri de joǵary bolady», - dedi Úkimet basshysy.
Onyń atap ótýinshe, jinaqtaýshy zeinetaqy júiesine qatysýshylar úshin jetkilikti zeinetaqy jinaǵy bolǵan kezde zeinetaqy annýitetin satyp alý quqyǵy saqtalǵan. Sol arqyly áielder 51,5 jastan, al erkekter 55 jastan Biryńǵai jinaqtaýshy zeinetaqy qorynan zeinetaqy tólemin taǵaiyndai alady.
«Oryn alǵan ekonomikalyq ahýaldy, halyqaralyq tájiribeni jáne ekonomikalyq ári demografiialyq faktorlarǵa negizdelgen uzaq merzimdi ózekti boljamdy eskere otyryp, zeinet jasyn kóterý qajettilik sanalady. Jumyspen qamtylǵan halyqqa zeinetkerler sanynyń araqatynasy artyp kele jatqanyn da eskergen jón. Eger 2010 jyly 1 zeinetkerge 4,8 jumys isteýshi bolsa, 2015 jyly 4,3, al 2019 jyly 3,9 jumysshy boldy. Buǵan qosa, halyqaralyq tájiribege júrgizilgen sholý qart adamdar úlesiniń artýynyń turaqty tendentsiiasyn kórsetip otyr. Bul da eńbek naryǵyndaǵy ahýalǵa yqpal etedi. Ortasha eseppen alǵanda álemde 65jastan asqan tulǵalardyń úlesi 10 paiyzǵa ósetindigin boljanyp otyr. Bul da óz kezeginde zeinetaqy júiesiniń turaqtylyǵyna áserin tigizedi. Osyǵan orai zeinet jasyn kóterý álemniń kóptegen elinde oryn alýda. Osylaisha, zeinet jasyn kóterý halyqaralyq tájiribege sai keledi jáne álemdegi ekonomikalyq jáne demografiialyq ahýalǵa bailanysty oryn alady», - dedi Asqar Mamin.
Qazaqstandyqtar neshe jasynda zeinetke shyǵady?
Qazaqstanda 2018 jyldyń qańtarynan erler men áielderdiń zeinet jasyn teńestirý jumysy bastaldy. Zańǵa sáikes, 2027 jylǵa deiin qazaqstandyq áielderdiń zeinet jasyna jarty jyldan qosylyp otyrady. Al erler úshin eshteńe ózgergen joq – olar zeinet demalysyna burynǵydai 63 jasta shyǵady.
-
2021 jyldyń 1 qańtarynan — 60 jasynda;
-
2022 jyldyń 1 qańtarynan — 60,5 jasynda;
-
2023 jyldyń 1 qańtarynan — 61 jasynda;
-
2024 jyldyń 1 qańtarynan — 61,5 jasynda;
-
2025 jyldyń 1 qańtarynan — 62 jasynda;
-
2026 jyldyń 1 qańtarynan — 62,5 jasynda;
-
2027 jyldyń 1 qańtarynan — 63 jasynda.
Dese de, keibir áielderdiń zeinet jasy ózgermeidi. Olardyń ishinde kópbalaly analar jáne Semei iadrolyq poligonynda turǵan áielder bar.
Depýtattardyń usynysy
Buǵan deiin májilistegi "Halyq kommýnisteri" fraktsiiasy zeinet jasyn 60 jasqa deiin tómendetýdi usynǵan edi.
Májilismen Aiqyn Qońyrovtyń aitýynsha, kúzgi-qysqy mezgildiń kelýimen JRVI jáne tumaý siiaqty maýsymdyq aýrýlar órshidi. Koronavirýstyń aýyr túrine shaldyǵý jáne ólim qateri aitarlyqtai artady. Munyń bári, ásirese, 60 jas jáne odan úlken adamdar úshin qosymsha qaýipsizdik sharalaryn qabyldaýdy talap etedi.
Osyǵan bailanysty "Halyq kommýnisteri" fraktsiiasy azamattardyń zeinetkerlikke shyǵý jasyn qaita qaraýǵa shaqyrdy.
