QR Premer-Ministri Asqar Mamin Kásipkerlik máseleleri jónindegi jobalyq keńse otyrysyn ótkizdi, dep habarlaidy "Ult aqparat" primeminister.kz silteme jasap.
Reformalar jónindegi Joǵary keńestiń otyrysynda kásipkerlikti qoldaý boiynsha maquldanǵan sharalar týraly ulttyq ekonomika ministri Áset Erǵaliev, jeńildikti nesie berý baǵdarlamalarynyń monitoring nátijeleri jáne memlekettik qoldaý sharalarynyń tiimdiligin baǵalaý týraly Premer-Ministrdiń orynbasary Roman Skliar, memlekettik qoldaý sharalaryn ázirleý, memlekettik satyp alýdaǵy jergilikti qamtý, «Samuryq-Qazyna» UÁQ» AQ jáne jer qoinaýyn paidalanýshylardyń satyp alýy boiynsha bizneske júrgizilgen saýalnamanyń aralyq qorytyndylary, mikroqarjy uiymdarynyń, áleýmettik-kásipkerlik korporatsiialarynyń máseleleri jáne óńirlerdegi ShOB-tyń damý áleýeti týraly «Atameken» UKP basqarma tóraǵasy Abylai Myrzahmetov baiandady.
Otyrysqa Úkimet músheleri, Prezident Ákimshiliginiń, jergilikti atqarýshy organdardyń, «Samuryq-Qazyna» UÁQ» AQ, damý institýttarynyń, Qazaqstan qarjygerler qaýymdastyǵynyń, óńirlik kásipkerler palatasynyń jáne t. b.ókilderi qatysty.
Biyl 29 qańtarda ótken Reformalar jónindegi Joǵary keńestiń otyrysynda biznesti damytýdy odan ári yntalandyrý boiynsha kelesi sharalar qaraldy:
- biryńǵai tólemmen beseýiniń ornyna biryńǵai mólsherlemeni belgilei otyryp, eńbekaqy tóleý qoryna júktemeni tómendetý;
- jańa óndiristik kompaniialar úshin 2 jyl ishinde QQS-ty azaitý;
- qaita investitsiialaýǵa baǵyttalǵan tabystyń bir bóligin korporativtik tabys salyǵynan bosatý;
- Úkimet investitsiialar týraly kelisimder jasasatyn basym qyzmet túrleriniń tizbesin keńeitý (óńdeý ónerkásibi, AÓK, mashina jasaý, azyq-túlik jáne daiyn ónim óndiretin, tereń óńdeý boiynsha basqa da salalar);
- jeke kásipkerler úshin salyq mindettemelerin tirkeýdi jáne oryndaýdy jeńildetý;
- saýda, aýyl sharýashylyǵy, kólik, turý jáne tamaqtaný boiynsha qyzmet kórsetý salalaryndaǵy bizneske qoiylatyn barlyq talaptardy úshten bir bóligine qysqartý;
- «Biznestiń jol kartasy-2025» sýbsidiialaý baǵdarlamasyna mikroqarjy uiymdaryn qosý;
- qoǵamdyq tamaqtaný salasy úshin 6% mólsherleme boiynsha bólshek salyq rejimin engizý.
Atalǵan sharalardy biyl engizý josparlanyp otyr, bul 2025 jylǵa qarai 500 myń adamdy jaldamaly qyzmetkerlerdi resmi jumyspen qamtýǵa tartýdy, jyl saiyn óńdeýshi ónerkásipte 15 p.t. investitsiialardy ulǵaitýdy, kóleńkeli ekonomikany JIÓ 15% deiin tómendetýdi, sondai-aq mikro jáne shaǵyn biznes sýbektileriniń 75%-y úshin eńbekaqy tóleý qoryna júktemeni azaitýdy qamtamasyz etýge múmkindik beredi.
Biyl «Qarapaiym zattar ekonomikasy», «BJK-2025», «Eńbek», «Jumyspen qamtýdyń jol kartasy» baǵdarlamalary jáne Ulttyq banktiń ainalym qarajatyn tolyqtyrýǵa nesie berý baǵdarlamasy aiasynda biznesti qoldaýǵa 703 mlrd teńgeden astam qarajat qarastyrylǵan.
BJK-2025 baǵdarlamasyn júzege asyrýdyń oń qarqyny baiqalýda. Osy jyldyń qańtar aiynda 60 mlrd teńge somasyna 333 joba nesielendirilip, 326 joba kepildendirildi.
«Qarapaiym zattar ekonomikasy» jeńildikpen nesielendirý baǵdarlamasy boiynsha búginde 707,8 mlrd teńge somasyna 2 801 joba maquldandy, 527,7 mlrd teńge somasyna 2243 joba sýbsidiialandy.
«Shaǵyn jáne orta biznesti ekonomikalyq shynaiylyqtyń jańa jaǵdaiynda qoldaý – Úkimet jumysynyń basymdyqtarynyń biri. Kásipkerlerdi memlekettik qoldaýmen qamtýdy barynsha keńeitý qajet. Bul ekonomikanyń damýyna qosymsha serpin beredi. Ákimdikter bólinetin qarajattyń joǵary tiimdiligin qamtamasyz etýi tiis», — dedi A. Mamin.
Úkimet basshysy «Atameken» UKP-nyń 13 myńnan astam kásipkerge júrgizgen saýalnamasynyń qorytyndylaryn egjei-tegjeili zerdelep, bir apta ishinde biznesti odan ári qoldaý jónindegi qosymsha sharalardy daiyndaýdy tapsyrdy.
Sondai-aq, Premer-Ministr retteletin satyp alýlardaǵy jergilikti qamtýdy baqylaýdy, óńirlerdiń ekonomikalyq kartasyn ýaqytyly jáne sapaly toltyrýdy qamtamasyz etýdi, otandyq kásiporyndardyń óndiristik qýattaryn júkteý maqsatynda óńirlerdegi kásiporyndardy pasporttaýdy júrgizýdi jáne mikroqarjy uiymdaryn qurýdy jedeldetýdi tapsyrdy.
