QR Premer-Ministri Asqar Mamin Qarjy ministrliginiń ujymyna jańa ministr Erulan Jamaýbaevty tanystyrdy, dep habarlaidy "Ult aqparat".
Úkimet basshysy Qarjy ministrliginiń aldyna elimizdegi qarjylyq turaqtylyqty qamtamasyz etý, biýdjet shyǵyndaryn ońtailandyrý, biýdjettiń atqarylýy, kedendik jáne salyqtyq ákimshiliktiń tiimdiligin arttyrý boiynsha mańyzy úlken mindetter qoiylyp otyrǵanyn atap ótti.
A. Mamin E. Jamaýbaevtyń qarjy-bank salasyndaǵy zor eńbek tájiribesi jańa ministrge qoiylǵan mindetterdi tabysty sheshýge múmkindik beredi degen senim bildirdi.
E. Jamaýbaev uzaq jyldar boiy Ulttyq bank júiesinde eńbek etken, jetekshi sarapshydan bastap departament direktory laýazymyna deiin ósken. «Qazaqstannyń turǵyn úi qurylys jinaq banki» AQ basqarýshy direktory qyzmetin atqarǵan, QR Prezidenti Ákimshiliginiń Áleýmettik-ekonomikalyq monitoring bólimin basqarǵan, QR Prezidentiniń kómekshisi bolyp jumys istegen. Osy taǵaiyndaýǵa deiin QR Qarjy ministrliginde jaýapty hatshy qyzmetin atqarǵan.
