Qaraǵandy oblysyna jumys sapary aiasynda QR Premer-Ministri Asqar Mamin men álemdegi eń iri avtobýs óndirýshi «Yutong Group» kompaniiasynyń basqarma tóraǵasy Tan Iýisian telekópir rejiminde Saran qalasyndaǵy zaýytta «Yutong» markaly avtobýstar men arnaiy tehnikany shaǵyn toraptyq óndirý (CKD) jelisiniń ashylýyna qatysty. Bul týraly primeminister.kz saity habarlady.
Jobany «QazTehna» JShS elimizdiń avtobýs parkin jańartý baǵdarlamasy aiasynda júzege asyrýda. Osy ýaqytqa deiin zaýytta DKD iri torapty ádisimen avtobýstar shyǵarylyp keldi. CKD shaǵyn torapty óndiristik jelisin iske qosý zaýyttaǵy jańa jumys oryndarynyń sanyn 1 myń adamǵa deiin arttyrýǵa múmkindik beredi. Qýattylyǵy jylyna 1200 avtobýs pen 500 birlik arnaiy tehnikany quraidy. Óndiristi jergiliktendirý deńgeii 50% asady.
Budan bólek, Úkimet basshysy «Saran» indýstriialyq aimaǵynyń damýymen, onyń ishinde shina óndirý jónindegi jobanyń iske asyrylý barysymen tanysty. Jobany «Tatneft» JAQ qatysýymen «KamaTyresKZ» JShS júzege asyrady. Zaýyttyń qýattylyǵy birinshi kezeńde jyl saiyn 3,5 mln kópbeiindi shinany quraidy, keiinnen jylyna 9 mln shinaǵa deiin jetkiziledi.
Zaýyt QR avtomobil óndirisin jergiliktendirý deńgeiin arttyrýǵa jáne shinalardyń importyn almastyrýdy qamtamasyz etýge múmkindik beredi. Bul rette ónimniń 40% eksporttaý kózdelgen. Jobany 2022 jyldyń IV toqsanynda iske asyrý josparlanǵan. Joba quny – 125 mlrd teńge.
Zaýytta 1100-den astam jańa joǵary bilikti jumys oryndary qurylatyn bolady. Qazirgi tańda kásiporynnyń bolashaq qyzmetkerleri – negizinen Saran qalasynyń turǵyndary qatarynan «Tatneft» JAQ-tyń shina kásiporyndarynda taǵylymdamadan ótip jatyr. A. Mamin olarmen telekópir rejiminde áńgimelesti.
Premer-Ministrge Saran qalalyq RTB turǵyn shaǵyn aýdanyn qalpyna keltirý jumystarynyń barysy týraly baiandaldy – 2022 jyldyń sońyna qarai munda kásiporyndar qyzmetkerleri men turǵyn úi alýǵa kezekte turǵan adamdar úshin 510 jaldamaly jáne qyzmettik páterdi paidalanýǵa berý josparlanyp otyr.
Qaraǵandy qalasynda Úkimet basshysy sanitarlyq-tehnikalyq maqsattaǵy ónimder men jylytý aspaptaryn shyǵaratyn «Santehprom» JShS-da boldy. Kásiporyn jyl saiyn 810 myń birlik santehnikalyq ónim – vannalar, jýǵyshtar, tabandyqtar men radiatorlar shyǵarady. Importty almastyrý aiasynda bolat paneldi radiatorlardy óndirý jelisin jańǵyrtý kózdelgen.
A. Mamin qýattylyǵy jylyna 2 mln tonna kómir kontsentratyn quraityn «Qaz Carbon» JShS baiytý fabrikasynyń jumysymen tanysty. Kásiporyn barlyq qajetti ekologiialyq normalarǵa sai keledi. Qaraǵandy oblysy Buqar Jyraý aýdanynyń Úshtóbe aýylynda Úkimet basshysy «Qaraǵandy-Bekire» JShS-da boldy. Kásiporynnyń jobalyq qýaty – jylyna 5 tonnaǵa deiin ýyldyryq pen 100 tonna taýarly bekire balyǵy eti. 2023 jylǵa deiin shyǵarylatyn ónim kólemin jylyna 20 tonna ýyldyryqqa jáne 300-350 tonna bekire balyǵynyń etine deiin arttyrý josparlanýda.
Úkimet basshysyna balyq pen aýyl sharýashylyǵy malyna arnalǵan túiirshiktelgen baiytylǵan jasyl jemshóp óndirý jáne qaita óńdeý jónindegi qurama jem zaýyty qurylysynyń investitsiialyq jobasy tanystyryldy. Kásiporynnyń qýattylyǵy jylyna 365 myń tonna ónimdi quraidy. Joba quny – 27 mlrd teńge. Iske asyrý merzimi – 2021-2022 jyldar. 1 myńǵa jýyq jańa jumys orny qurylady.
Premer-Ministr Aqsý-Aiýly jáne Gúlshat kentterinde jalpy uzyndyǵy 363 km «Qaraǵandy – Balqash» jáne uzyndyǵy 583 km «Balqash – Býrylbaital – Kúrti – Qapshaǵai» avtomobil joldaryn rekonstrýktsiialaý barysymen tanysty. Úkimet basshysy biyl atalǵan jobalarda qozǵalystyń ashylýyn qamtamasyz etýdi tapsyrdy.
Jumys saparyna Qaraǵandy oblysynyń ákimi Jeńis Qasymbek, Indýstriia jáne infraqurylymdyq damý ministri Beibit Atamqulov, Ekologiia, geologiia jáne tabiǵi resýrstar ministri Maǵzum Myrzaǵaliev jáne taǵy basqalary qatysty.
