QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda epidemiiaǵa qarsy sharalardy iske asyrý barysy qaraldy, dep habarlaidy primeminister.kz caity.
Densaýlyq saqtaý ministri A. Tsoi koronavirýs infektsiiasynyń rastalǵan jaǵdailarynyń táýliktik ósýi 1,2%-dan aspaitynyn, bul kórsetkish kún saiyn tómendeýde ekenin baiandady.
Qazirgi ýaqytta emdelip shyqqan adamdar barlyq aýrý juqtyrǵandardyń 68% quraidy, qalǵan naýqastar qajetti meditsinalyq kómek alýda. Aýrýhanalardyń júktemesi 36%-ǵa tómendedi.
Aptanyń qorytyndysy boiynsha infektsiianyń reprodýktivtik deńgeiiniń 1-den tómen bolýy Atyraý, Aqtóbe, Mańǵystaý, Qyzylorda, Shyǵys Qazaqstan, Jambyl, Túrkistan, Pavlodar oblystary men Nur-Sultan, Shymkent, Almaty qalalarynda tirkelgen. Sonymen qatar Qostanai men Aqmola oblystarynda infektsiianyń reprodýktivtik deńgeii 1-den joǵary bolýy tirkelgen. Úkimet basshysy osy óńirlerdiń ákimderine epidemiiaǵa qarsy sharalardy kúsheitýdi tapsyrdy.
«Aýrý juqtyrǵan azamattardy emdeý jáne virýstyń taralýyn tómendetý jónindegi qarqyndy jumysty, onyń ishinde sanitarlyq normalardy, karantin talaptaryn azamattardyń saqtaý qajettigi týraly túsindirý naýqanyn jalǵastyrý kerek», — dedi A. Mamin.
Premer-Ministr qazirgi tańda álemdik statistika 126 memlekette aýrý juqtyrǵandar sanynyń jańa ósimin kórsetip otyrǵanyn, osyǵan bailanysty kúzde paida bolýy múmkin pandemiianyń jańa tolqynyna daiyn bolý kerektigin, ári onyń aldyn alý úshin barlyq belgilengen talaptardyń saqtalýyn qamtamasyz etip, josparlanǵan sharalar keshenin iske asyrý qajettigin atap aitty.
«Indettiń jańa tolqyny kúzde paida bolýy múmkin jáne oǵan daiyn bolýmyz kerek. Onyń aldyn alý úshin barlyq belgilengen talaptardyń saqtalýyn qamtamasyz etip, josparlanǵan sharalardyń keshenin iske asyrý qajet», - dedi ol.
