QR Premer-Ministri Asqar Mamin Frantsiia-Qazaqstan iskerlik keńesiniń teń tóraǵasy Iv-Lýi Darrikarer bastaǵan «Frantsiia-Qazaqstan» saýda-ónerkásip palatasynyń múshelerin jáne Frantsiia kásiporyndary qozǵalysynyń (MEDEF) ókilderin qabyldady, dep habarlaidy "Ult aqparat" primeminister.kz saityna silteme jasap.
«Qazaqstan men Frantsiia ‒ strategiialyq seriktester. Biz senimdi yntymaqtastyqtyń berik irgetasyn qalai aldyq. Bul eki tarap úshin de aitarlyqtai ekonomikalyq, saiasi jáne mádeni dividendter ákeledi», — dedi A. Mamin.
Biyl 9 aida Qazaqstan men Frantsiia arasyndaǵy taýar ainalymy Eýropalyq Odaqtyń basqa elderindegi kórsetkishterden arta otyryp, 6%-dan astam ósti jáne $3,4 mlrd qurady. Osy jyldyń birinshi jartyjyldyǵyndaǵy QR ekonomikasyna tikelei frantsýz investitsiialarynyń aǵymy 24%-dan astamǵa, $537 mln deiin ulǵaidy.
Úkimet basshysy kóptegen investitsiialyq jobalardyń belsendi iske asyrylý satysynda turǵanyn atap ótti. Qazaqstanda frantsýz kapitalynyń qatysýymen túrli salalarda 230-ǵa jýyq kásiporyn jumys isteidi, olardyń ishinde Total, Orano, Alstom jáne basqa da iri transulttyq korporatsiialar bar. Táýelsizdik jyldary Frantsiia kompaniialary Qazaqstanǵa $16,4 mlrd astam investitsiia saldy.
Úkimet basshysy men frantsýz kompaniialarynyń ókilderi eki eldiń biznes qurylymdary arasyndaǵy ózara tiimdi yntymaqtastyqty nyǵaitý, sondai-aq, energetika, sý sharýashylyǵy jáne turǵyn úi-kommýnaldyq infraqurylymyn jańǵyrtý, tsifrlyq densaýlyq saqtaý, biometriialyq júieler, avtomobil qurastyrý, transformator óndirisi, ǵaryshtyq jerserikterdi qurastyrý jáne t. b. salalardaǵy birlesken jobalardy iske asyrý máselelerin talqylady.
Kezdesýge QR Premer-Ministriniń birinshi orynbasary ‒ qarjy ministri Á. Smaiylov, indýstriia jáne infraqurylymdyq damý ministri B. Atamqulov, ulttyq ekonomika ministri R. Dálenov, ekologiia, geologiia jáne tabiǵi resýrstar ministri M. Myrzaǵaliev, densaýlyq saqtaý ministri E. Birtanov, syrtqy ister, energetika, tsifrlyq damý, innovatsiialar jáne aeroǵarysh ónerkásibi, saýda jáne integratsiia vitse-ministrleri, ulttyq kompaniialardyń basshylyǵy jáne t. b. qatysty.
Frantsýz delegatsiiasy quramynda Total, Orano, Alstom, Airbus, Vicat, Air Liquide, Idemia, Renault CIS & LADA Export, Veolia, Bouygues Travaux Publics, Catering International Services, DV Conseil, Lazard, Sanofi, TechnipFMC, TECOFI S.A.S. kompaniialary boldy.
Frantsiia kásiporyndarynyń qozǵalysy (MEDEF) ‒ túrli qyzmet salasyndaǵy 800 myń kompaniiany biriktiretin, eldiń biznes qaýymdastyqtarynyń iri uiymy.
