Búgin QR Premer-Ministri Asqar Maminniń tóraǵalyǵymen Elbasynyń «El úmiti» bastamasy aiasynda iske asyrylyp jatqan jáne «100 naqty qadam» ult josparyn sapaly oryndaýǵa baǵyttalǵan Ózgeristerdi basqarý jónindegi salalyq menedjerlerdi daiarlaý baǵdarlamasynyń qatysýshylarymen keńes ótti.
Bul týraly Úkimettiń resmi saity habarlady.
Sharaǵa Prezidenttiń kómekshisi – QR Qaýipsizdik Keńesiniń Hatshysy Áset Isekeshev jáne 300-ge jýyq maman – mentorlar men ózgeris menedjerleriniń komandalary qatysty, olardyń kóshbasshylary 11 salalyq memlekettik saiasatta: bilim berýde, geologiialyq barlaýda, saýda jáne logistikada, ónerkásipte, onyń ishinde jańa indýstriiada, qurylysta, óńirlik damýda, densaýlyq saqtaýda, media salasynda, aýyl sharýashylyǵynda, týrizm men sý resýrstary salasynda 37 naqty mindetti sheshý úshin qajetti jańa tásilder men ideialardy tanystyrdy.
Premer-Ministr Baǵdarlamaǵa qatysýshylardy irikteý Úkimettiń ortasha merzimdik perspektivaǵa arnalǵan jumysynyń negizgi baǵyttaryna sáikes júrgizilgenin atap ótti. Atap aitqanda, olar: ulttyq ekonomikanyń ózin-ózi qamtamasyz etýin arttyrý, Qazaqstannyń aimaqtyq azyq-túlik haby retinde qalyptasýy, sapaly investitsiialardy tartý úshin jańa tásilderdi ázirleý, kúshti kásipkerlik klas qurý, qazaqstandyq eksportty qarqyndy ilgeriletý, jedeldetilgen tsifrlandyrýdy qamtamasyz etý, bilim berý men ozyq ǵylymdy damytý, densaýlyq saqtaý júiesin nyǵaitý jáne infraqurylymdy odan ári keshendi damytý.
«Bilim berý men adam damýyna investitsiialar salý – turaqty ári uzaq merzimdi ekonomikalyq ósimniń negizgi faktory. Árbir tabysty ideianyń, praktikanyń, reformanyń artynda adam tur. Sizderdiń árqaisylaryńyzdyń áleýetińiz, kásibi bilimderińiz, eń bastysy, Qazaqstannyń gúldenýine jeke úles qosýǵa degen nietterińiz bar», — dedi A. Mamin.
Úkimet basshysy Úkimet múshelerine ózderiniń salalyq komandalarymen turaqty jumys kezdesýlerin ótkizýge erekshe nazar aýdarýdy jáne alǵa qoiylǵan mindetterdi iske asyrýǵa qajetti járdem kórsetýdi tapsyrdy.
«Usynystardy naqtylap, olardy engizýdiń naqty josparlaryn ázirleý qajet», — dep atap ótti A. Mamin.
Ózgeristerdi basqarý jónindegi salalyq menedjerlerdi daiarlaý baǵdarlamasyna QR Tuńǵysh Prezidenti – Elbasy Qory bastamashylyq etti jáne ol QR Úkimetiniń Jobalyq ofisimen birlesip iske asyrylyp jatyr. Baǵdarlamanyń maqsaty - ekonomikanyń negizgi salalaryn transformatsiialaý úshin naqty usynystar ázirleý. Osy jyldyń basynda ótkizilgen konkýrstyń qorytyndysy boiynsha 2 958 úmitkerdiń ishinen úlken praktikalyq jumys tájiribesi bar, onyń ishinde jetekshi ulttyq jáne sheteldik uiymdarda eńbek etken 230 sarapshy iriktelip alyndy.
Baǵdarlamaǵa mentorlar retinde Qazaqstannyń, AQSh-tyń jáne Eýropa elderiniń memlekettik jáne jeke sektorynan 50-den astam maman qatysady. Baǵdarlamaǵa qatysýshylar salalyq mindetterdi sheshe otyryp, elimizdiń damýyna úles qosyp qana qoimai, sonymen qatar treningtik jáne koýchingtik is-sharalarda ózderiniń salalyq ári kóshbasshylyq biliktilikterin shyńdaidy.
