Úkimet úiinde Qazaqstan Respýblikasynyń Premer-Ministri Asqar Mamin Eýropa qaita qurý jáne damý bankiniń óńirlik direktory Agris Preimanispen jáne Dúniejúzilik banktiń QR-daǵy ókili Ato Braýnmen kezdesýler ótkizdi, dep habarlaidy primeminister.kz.
Kezdesýler barysynda halyqaralyq qarjy institýttarymen yntymaqtastyqty odan ári tereńdetý máseleleri jáne Qazaqstanda turaqty, teńgerilimdi jáne ártaraptandyrylǵan ekonomika qurý men qurylymdyq reformalardy júrgizý úrdisindegi ózara is-qimyldyń perspektivaly baǵyttary talqylandy.
Asqar Mamin men Agris Preimanis jańartylatyn energiia kózderi (JEK), infraqurylym men kólik, qarjy sektory arqyly ShOB-ty qoldaýǵa basa nazar aýdarýmen energetikalyq sektordaǵy ózara is-qimyldyń strategiialyq baǵyttary jáne basqa da máselelerdi talqylady. MJÁ salasyndaǵy, retteletin sektorlardaǵy transformatsiia jáne jekeshelendirý úrdisterindegi, tariftik saiasattaǵy reformalar qarastyryldy.
Ato Braýnmen Áriptestiktiń shekti strategiiasy men Birlesken ekonomikalyq zertteýler baǵdarlamasynyń iske asyrylý barysy qarastyryldy. 2019-2024 jyldarǵa arnalǵan Áriptestiktiń eldik strategiiasynyń jobasyna, atap aitqanda, adam kapitalynyń sapasyn arttyrý, jekemenshik sektordy, investitsiialyq ahýal men saýdany damytý, sondai-aq kólik infraqurylymy men óńirlerdi damytý máselelerine erekshe kóńil bólindi.
Sonymen qatar ózara is-qimyldyń basymdyqty salalary retinde týrizm, AÓK, indýstriialandyrý, tsifrlyq innovatsiialar, kólik-logistika salasy men óńirlik infraqurylymdy damytý qaraldy. Sonymen qatar, taraptar Qazaqstannyń 2025 jylǵa deiingi strategiialyq damý maqsattaryna qol jetkizýge baǵyttalǵan, uzaq merzimdi jobalarǵa basymdyq berilgen Birlesken ekonomikalyq zertteýler baǵdarlamasy aiasynda yntymaqtastyq basymdyqtaryn anyqtady.
EQQDB-men yntymaqtastyq jyldary Qazaqstanda jalpy somasy €7,676 mlrd bolatyn 253 joba qarjylandyryldy. EQQDB jobalarynyń aǵymdaǵy qorjyny jalpy somasy $2,75 mlrd bolatyn 123 jobadan turady.
Dúniejúzilik banktiń jobalar qorjyny búgingi tańda 22 jobany qamtidy, onyń ishinde 7 aǵymdaǵy joba (shekti kelisimnen tys) jáne Áriptestik týraly shekti kelisim aiasynda 15 joba qamtylǵan.
