QR Premer-Ministri Memleket basshysynyń Jarlyǵymen taǵaiyndalǵan ministr Aleksei Tsoidy Densaýlyq saqtaý ministrliginiń ujymyna tanystyrdy, dep habarlaidy "Ult aqparat".
A. Mamin koronavirýs pandemiiasymen kúres jaǵdaiynda halyq densaýlyǵyn saqtaý boiynsha densaýlyq saqtaý júiesiniń aldynda turǵan mindetterdi sheshýdiń mańyzdylyǵyn atap ótti.
Memleket basshysy burynǵy densaýlyq saqtaý ministri E. Birtanovty densaýlyq jaǵdaiyna bailanysty bergen ótinishine sáikes qyzmetinen bosatty. E. Birtanov otstavkaǵa ketý týraly bergen ótinishinde óziniń aýyrýyna bailanysty jáne qosymsha emdeýdi qajet etýine orai densaýlyq saqtaý salasyna tolyqqandy basshylyq jasaý, ásirese, epidemiologiialyq jaǵdaidyń asqynýy jaǵdaiynda qiyn bolyp otyrǵanyn atap ótti. Ol densaýlyq saqtaý ministri qyzmetinde kúndelikti júieli jumys istep, ministrliktiń barlyq qurylymdaryna turaqty túrde qatań baqylaý jáne shuǵyl basqarý jumystary talap etiletinin atap ótti.
Aleksei Vladimirovich Tsoi 1977 jyly 2 sáýirde Ońtústik Qazaqstan oblysynda dúniege kelgen. Sells College (London), Qazaqstan memlekettik meditsina akademiiasynyń aspirantýrasyn, Ońtústik Qazaqstan memlekettik meditsina akademiiasyn, «Dáneker» halyqaralyq quqyq jáne halyqaralyq biznes institýtyn, RF Prezidenti janyndaǵy Resei halyq sharýashylyǵy jáne memlekettik qyzmet akademiiasynyń korporativtik basqarý joǵary mektebin támamdaǵan. Stenford ýniversitetinde (AQSh), Singapýrda, Máskeýde, Germaniiada, Ulybritaniiada jáne t. b. elderde taǵylymdamadan ótken. Iskerlik ákimshilik doktory, meditsina ǵylymdarynyń kandidaty.
Hirýrg-endoskopist bolyp jumys istegen, Qalpyna keltirý hirýrgiiasy jáne transplantologiia ortalyǵynyń aǵa ǵylymi qyzmetkeri, Ulttyq ǵylymi meditsina ortalyǵynyń ishki meditsina ortalyǵynyń jetekshi ǵylymi qyzmetkeri, «Eýroaziattyq respiratorlyq qoǵam» qoǵamdyq birlestiginiń bas hatshysy, QR Prezidenti Is basqarmasynyń Zamanaýi meditsinalyq tehnologiialardy engizý ortalyǵynyń direktory, QR Prezidenti Is basqarmasynyń Meditsinalyq ortalyǵynyń basshysy, Astana qalasynyń №1 qalalyq aýrýhanasynyń bas dárigeri, QR densaýlyq saqtaý jáne áleýmettik damý vitse-ministri, QR densaýlyq saqtaý vitse-ministri qyzmetterin atqarǵan.
2019 jylǵy aqpannan bastap Qazaqstan Respýblikasy Prezidenti Is basqarmasynyń Meditsinalyq ortalyǵyn basqardy, 22 maýsymda densaýlyq saqtaý birinshi vitse-ministri bolyp taǵaiyndaldy.
