QR Premer-Ministri Asqar Maminniń tóraǵalyǵymen ótken «Báiterek» ulttyq basqarýshy holdingi» AQ Direktorlar keńesiniń otyrysynda holdingtiń 2019 jylǵa aýdittelgen qarjylyq eseptiligi aldyn-ala bekitildi, dep habarlaidy "Ult aqparat" primeminister.kz-ke silteme jasap.
Holdingtiń kompaniialar tobynyń aktivteri 2019 jyldyń qorytyndysy boiynsha 5 trln 214 mlrd teńgeni qurap, 10,5%-ǵa ósti (2018 jyly – 4 trln 719 mlrd teńge), al shoǵyrlandyrylǵan taza paida 48,4%-ǵa ósip, 51,5 mlrd teńgeni qurady (2018 jyly – 34,7 mlrd teńge).
Otyrysqa qatysýshylar «Báiterek» holdinginiń 2016-2020 jyldarǵa respýblikalyq biýdjetten jáne QR Ulttyq qorynan bólingen qarjy resýrstaryn paidalanýy týraly aqparatpen tanysty. Qarajat josparǵa sáikes igerilýde. Sonymen, biylǵy 1 sáýirdegi jaǵdai boiynsha atalǵan kezeńde bólingen 957,9 mlrd teńge esebinen, qaitarylǵan qarajatty qaita igerýdi eskere otyryp, ekonomika 1 trln 164,9 mlrd teńge kóleminde qarjylandyryldy.
Direktorlar keńesi holdingtiń 2019 jylǵa arnalǵan korporativtik basqarý kodeksiniń qaǵidalary men erejeleriniń saqtalýy týraly esepti bekitti. Qujatta korporativtik basqarý qaǵidattarynyń saqtalýyn baqylaý nátijeleri jáne onyń erejelerin oryndaý boiynsha qabyldanǵan is-sharalar týraly egjei-tegjeili aqparat berilgen.
Sonymen qatar otyrysta holdingtiń 2020 jylǵy I toqsandaǵy táýekelder boiynsha esebi jáne sol kezeńdegi Ishki aýdit qyzmetiniń esebi bekitildi.
