QR Premer-Ministri Asqar Mamin jumys sapary barysynda Qyzylorda oblysynyń Baiqońyr qalasynyń áleýmettik-ekonomikalyq damý barysymen tanysty.
Sondai-aq Úkimet basshysy qaladaǵy ǵarysh salasyndaǵy birlesken qazaqstandyq-reseilik jobalardyń iske asyrylýyn kórdi, dep habarlaidy "Ult aqparat" QR Úkimetiniń resmi saityna silteme jasap.
Úkimet basshysyna qalany gazdandyrý jáne sýmen jabdyqtaý, týristik infraqurylymdy damytý, sondai-aq Baiqońyr qalasynda «Baiqońyr» AEA qurý jumystarynyń júrgizilý barysy týraly baiandaldy.
«Soiýz MS-18» basqarylatyn korabliniń ushyrylýyn jáne onyń Halyqaralyq ǵarysh stantsiiasymen túiisýin birlesip baqylaǵannan keiin Úkimet basshysy «Roskosmos» ǵarysh qyzmeti memlekettik korporatsiiasynyń bas direktory Dmitrii Rogozinmen ǵarysh salasyndaǵy Qazaqstan-Resei yntymaqtastyǵynyń ózekti máselelerin talqylady.
Premer-Ministr adamnyń ǵaryshqa alǵash ushýynyń 60 jyldyǵyna arnalǵan konferentsiianyń plenarlyq otyrysyna qatysty. Úkimet basshysy QR Prezidenti Qasym-Jomart Toqaevtyń sharaǵa qatysýshylarǵa arnaǵan sózin oqyp berdi.
«Mine, 65 jyl boiy álemdegi eń iri ǵarysh ailaǵy bolyp kelgen Baiqońyr ǵarysh ailaǵynan 150 ǵaryshker keń baitaq ǵalamdy igerdi. Olardyń qatarynda qazaqstandyq ǵaryshkerler Toqtar Áýbákirov, Talǵat Musabaev jáne Aidyn Aiymbetov bar. Qazaqstan men Reseidiń odan ári belsendi jáne jemisti yntymaqtastyǵy ǵaryshtyq zertteýler men basqarylatyn ushýlar salasyndaǵy birlesken jobalar men baǵdarlamalardy iske asyrýǵa yqpal etetinine senimdimin», — dedi Mamin.
Konferentsiianyń plenarlyq otyrysyna «Roskosmos» memlekettik korporatsiiasynyń basshysy Dmitrii Rogozin, QR tsifrlyq damý, innovatsiialar jáne aeroǵarysh ónerkásibi ministri Baǵdat Mýsin, NASA ákimshisiniń orynbasary Kennet Baýersoks, qazaqstandyq ǵaryshkerler Toqtar Áýbákirov, Talǵat Musabaev, Aidyn Aiymbetov jáne Muhtar Aimahanov, «One Web» jáne «SES Networks» spýtniktik operatorlarynyń basshylyǵy jáne t.b. qatysty.
