QR Premer-Ministri Asqar Mamin Aqtóbe jáne Atyraý oblystaryna jumys sapary aiasynda «Aqtóbe – Atyraý – Astrahan» avtojolyn rekonstrýktsiialaý barysyn tekserdi, dep habarlaidy primeminister.kz.
Avtojoldyń jalpy uzyndyǵy - 897 shaqyrym. Onyń ishinde Aqtóbe oblysy boiynsha – 311 km, Atyraý oblysy boiynsha – 586 km. 2015 jyly «Atyraý – Maqat» ýchaskesiniń 164 shaqyrymy qaita salyndy.
Qazirgi tańda «Aqtóbe – Qandyaǵash», «Qandyaǵash – Maqat», «Atyraý – RF shekarasy» ýchaskelerindegi avtojoldyń 733 shaqyrymynda rekonstrýktsiialaý jumystary júrgizilip jatyr.
«Aqtóbe – Qandyaǵash» ýchaskesi (96 km) 4 jolaqty qozǵalysy bar I sanatty 78 km joldy jáne 2 jolaqty qozǵalysy bar II sanatty Qandyaǵash qalasyn ainalyp ótetin 18 shaqyrym joldy qamtidy. Jyl sońyna deiin munda 18 shaqyrymdy jańa jol tósemimen qamtamasyz etý josparlanǵan.
«Qandyaǵash – Maqat» ýchaskesinde (360 km) asfaltbeton tóseý jáne joldy abattandyrý boiynsha sońǵy jumystar júrgizilip jatyr. 2021 jyly jańa jabynmen ýchaskeniń barlyq uzyndyǵy boiynsha qozǵalysty tolyq qamtamasyz etý kózdelgen. Bul rette Aqtóbe qalasynan Atyraý qalasyna deiingi jol eki ese qysqarady – buryn Aqtóbe-Atyraý ýchaskesiniń qanaǵattandyrarlyqsyz jai-kúiine bailanysty júrgizýshilerge kórshiles óńirge Oral arqyly baryp, qosymsha 500 shaqyrymǵa jýyq jol júrýge týra keletin.
Jalpy uzyndyǵy 277 shaqyrymǵa sozylatyn «Atyraý – RF shekarasy» ýchaskesi (Astrahan qalasy baǵytynda) 1970 jyldary osine 8 tonna júktememen salynǵan III sanattaǵy respýblikalyq mańyzy bar jol bolyp tabylady. Aýyr júk tasymaldaityn tranzittik kólik quraldarynyń qozǵalys qarqyndylyǵynyń artýyna bailanysty joldyń jaǵdaiy nasharlap ketken.
Qaita jóndeý nátijesinde jyl sońyna deiin 92 shaqyrym jolda qozǵalys qamtamasyz etiledi, qalǵan 185 shaqyrym jolda jer tósemi tóselip, jol tóseminiń, kópirler men qubyrlardyń qurylymdyq qabattary salynyp jatyr. Jumystardy 2022 jyly aiaqtaý josparlanýda.
2021 jyly Qazaqstanda 8,4 myń shaqyrym avtojol, onyń ishinde respýblikalyq mańyzy bar 5 myń shaqyrym, jergilikti jeli 3,4 myń shaqyrym jol qurylys jáne qaita jańartý jumystarymen qamtyldy. Jol-qurylys jumystaryna 200 myńǵa jýyq adam tartylǵan. Biyl elimizde 5,1 myń shaqyrym jolda jumystar aiaqtalatyn bolady. Qalǵan jumys kólemi aýyspaly jáne 2022 jyly oryndalady.
