QR Premer-Ministri Asqar Mamin Almaty oblysyna jumys sapary aiasynda óńirdiń AÓK, kólik-logistika, farmatsevtika, týrizm jáne basqa da ekonomika salalarynyń damýyn tekserdi, sondai-aq jańa investitsiialyq jobalardy iske asyrýdy bastap berdi, dep habarlaidy "Ult aqparat" Úkimettiń saityna silteme jasap.
Ile aýdanynyń «Bereke» indýstriialyq aimaǵynda Úkimet basshysy «FRUIT ART» JShS eksporttyq jemis-jidek klasteriniń infraqurylymyn salýdy bastap berdi.
Kásiporynǵa gaz ortasy retteletin, 15 myń tonna ónim syiatyn jemis saqtaý qoimasy, táýligine 200 tonna shikizatty qaita óńdeý qýaty bar jemister men jidekterdi sýblimatsiialyq keptirý zaýyty, sondai-aq 9 ga alańda jylyna 1800 tonna qulpynai jáne 900 tonna salatty jyl boiy ósiretin jylyjai kesheni kiredi. Birinshi kezeńde investitsiialardyń jalpy kólemi 34 mlrd teńgeni quraidy, ony 2022 jyly paidalanýǵa berý kózdelgen. Ónimdi óndirý jáne qaita óńdeý EO jáne AQSh elderiniń innovatsiialyq tehnologiialary boiynsha júzege asyrylatyn bolady. 500 turaqty jáne 7 500 maýsymdyq jumys orny ashylady. Jobany iske asyrý eldiń importqa táýeldiligin alma boiynsha 5%-ǵa, jidekter boiynsha 100%-ǵa tómendetýge jol ashady. Ishki naryqqa jetkizýmen qatar, kásiporyn ónimderi shetelge, onyń ishinde Eýropalyq Odaq elderine eksporttalatyn bolady.
Qapshaǵai qalasynda Úkimet basshysy teńiz balyǵyn ósiretin «Ospanova Development» JShS balyq ónerkásibi keshenin salý jobasynyń iske asyrylý barysyn tekserdi. Jobalyq qýaty jylyna 10 myń tonnaǵa deiin balyqty quraidy. Jobanyń quny – 67,3 mlrd teńge, birinshi kezeńdi iske asyrý merzimi – 2022 jyl.
Premer-Ministrge Almaty oblysynda 2025 jylǵa deiingi kezeńge arnalǵan qant salasyn damytý josparlary týraly baiandaldy. Sýarmaly jerlerdi keńeitý esebinen qant qyzylshasynyń egis alańdary 3,3 ese 53 myń gektarǵa deiin ulǵaitylady. Sý únemdeý tehnologiialaryn qoldaný jalpy ónim jinaý ósimin 3,6 ese 2 mln tonnaǵa deiin qamtamasyz etedi.
Úkimet basshysyna jalpy halyq sany 220 myń adamdy quraityn Almaty qalasynyń tórt seriktes qalasy qurylysynyń jobasy — «G4 City» tanystyryldy. Birinshi kezeńde 2370 ga aýmaqta jobalyq halyq sany 60 myń adamdy quraityn 1,4 mln sharshy metr turǵyn úimen «Gate City» salynady.
Panfilov aýdanynda Premer-Ministr Qazaqstan-Qytai shekarasyndaǵy «Nur Joly» ótkizý pýnktinde bolyp, «Qorǵas – Shyǵys qaqpasy» AEA kóliktik jáne logistikalyq infraqurylymynyń damýymen, Qurǵaq port operatorynyń qyzmetimen, «Qazposhta» AQ Bond qoimasynyń jumysymen, sondai-aq AEA-nyń perspektivalyq investitsiialyq jobalarymen tanysty.
A. Mamin qýaty jylyna 60 myń tonna jem-shópti quraityn «SSA Feed Mills» qurama jem zaýytynyń óndiristik jelisiniń saltanatty ashylý rásimine qatysty. Joba quny – 4,7 mlrd teńge. Ónimniń 55%-y ishki naryqqa baǵyttalady, 45%-y shetelge eksporttalatyn bolady.
Qarasai aýdanynyń Abai aýylynda Premer-Ministr immýnobiologiialyq preparattar shyǵaratyn «Antigen» ǴÓK» JShS jobasymen tanysty. Sondai-aq kásiporyn alańynda aiyna «QazVaq» vaktsinasynyń 1 mln dozasyna deiin quiý boiynsha halyqaralyq standarttarǵa sáikes keletin jeli uiymdastyrylǵan.
«Kólsai kólderi» jáne «Altyn Emel» memlekettik ulttyq tabiǵi parkterin aralaý barysynda Premer-Ministrge Almaty oblysynda týrizmdi damytý sharalary týraly baiandaldy.
Biylǵy jyldyń 8 aiynda Almaty oblysynyń ekonomikasynyń barlyq negizgi salalary boiynsha ósim, onyń ishinde ónerkásipte – 13,8%, aýyl sharýashylyǵynda – 1,1% ósim qamtamasyz etildi. Qurylys jumystarynyń kólemi ótken jyldyń sáikes kezeńimen salystyrǵanda 16,6%-ǵa artty. 663,5 myń sharshy metr turǵyn úi paidalanýǵa berildi. Óńirge 369,9 mlrd teńge investitsiia tartyldy (+2,3%).
Jumys saparyna Almaty oblysynyń ákimi Amandyq Batalov, indýstriia jáne infraqurylymdyq damý ministri Beibit Atamqulov, ekologiia, geologiia jáne tabiǵi resýrstar ministri Serikqali Brekeshev, energetika ministri Maǵzum Myrzaǵaliev, densaýlyq saqtaý ministri Aleksei Tsoi, «Samuryq-Qazyna» AQ basqarma tóraǵasy Almasadam Sátqaliev, «Báiterek» UBH» AQ basqarma tóraǵasy Aidar Áriphanov, aýyl sharýashylyǵy birinshi vitse-ministri Aidarbek Saparov, mádeniet jáne sport vitse-ministri Ǵabidolla Ábdirahymov jáne t. b. qatysty.
